Saturday before Epiphany (Year C)

Juan 1:43-51. Kinsa man kita ug unsa may atong bili atubangan sa Ginoo? Sa pagkadungog niya sa ngalan ni Jesus nga taga- Nazaret, si Natanael nidumili sa pagtoo nga Siya mao ang gipaabot sa Israel nga Manluluwas. Para kaniya, ang Mesiyas dili posible nga magagikan sa Nazaret, usa ka lugar nga dili inila. Apan natandog si Natanael sa dihang si Jesus niingon kaniya, “Aniay tinuod nga Israelita ug walay ikasaway kaniya.” Nahibulong si Natanael nganong nakaila si Jesus sa iyang pagkatawo. Kining ebanghelyo magtudlo kanato og duha ka bililhong butang. Una, ang mga ordinaryong dapit ug tawo, adunay espesyal nga lugar sa kasingkasing sa Ginoo. Ug ikaduha, ang Ginoo nakaila sa matag tawo ug nasayod Siya sa tanan nga anaa sa atong kasingkasing.

Friday before Epiphany (Year C)

Juan 1:35-42. Unsa may inyong gipangita? Sa atong pagsugod og bag-ong tuig, angay usab natong pamalandongan kining pangutana ni Jesus ngadto sa duha ka tinun-an. Sa atong kabahin, unsa man pud ang gusto natong makaplagan? Unsa may atong gustong mahuptan ning tuiga, kon dili man gani ning kinabuhia? Sa katilingban nga kalibotanon, daghang tawo ang mangandoy og kwarta, materyal nga butang, kaanyag, gahom ug dungog. Kini ang ilang gitoohan nga maghatag og kalipay ug katagbawan. Apan sa pagkatinood, kining mga butanga lumalabay lamang ug mawala ra sa pagdagan sa panahon. Mas maayo pa nga mangandoy kita sa mga butang nga molungtad sama sa gugma, panagdait ug kalinaw nga makaplagan lamang diha sa atong pagpakig-uban kang Cristo.

Feast of the Most Holy Name of Jesus (Year C)

Juan 1:29-34. Unsa may gipasabot sa ngalang JESUS – ang labing balaang ngalan nga atong gipasidunggan karong adlawa? Ang Jesus nagagikan sa Hudiyong ngalan nga Yeshua (Joshua) nga nagpasabot, “Ang Ginoo mao ang kaluwasan”. Diha sa ebanghelyo, si Jesus gitawag ni Juan nga “Kordero sa Dios nga nagawagtang sa sala sa kalibotan.” Ang hulagway sa kordero o nating karnero kanunay natong makita diha sa Balaang Kasulatan. Kasagaran, ang kordero nagpasabot sa usa ka biktima nga ihalad o isakripisyo sa altar. Para sa mga Kristiyanos, si Cristo mao ang bag-ong kordero kang kinsang kinabuhi, lawas ug dugo, gihalad alang sa atong kaluwasan. Ang Santos nga Misa kanunay’ng magpahinumdum kanato sa dakong gugma ni Jesus – ang manluluwas ug kordero sa Dios.

Wednesday before Epiphany (Year C)

Juan 1:19-28. Kinsa man ang angay’ng pasidunggan? Ang mga tawo nagtan-aw kang Juan nga usa ka bantogang propeta. Daghan ang naghunahuna nga siya mao ang Mesiyas. Mahimo niyang dawaton kining maong pagdayeg ug pahimuslan ang sayop nga pagtoo sa mga tawo. Apan wala kini buhata ni Juan. Hinoon, gisultihan niya ang mga tawo sa iyang tinuod nga papel nga mao ang pag-andam sa dalan nga agian sa Ginoo. Talagsaon kining kinaiya nga gipakita ni Juan tungod kay kadaghanan sa mga tawo gusto man nga daygon ug yukboan. Si Juan magdasig kanato sa pagpabiling matinud-anon ug mapaubsanon bisan kon kita mahimo nang dungganon. Hinumduman nato nga ang tanang kaayo nagagikan sa Ginoo, ug kon wala Siya, wala usab kitay mahimo.