Monday of the 23rd Week in Ordinary Time (Year C)

Lucas 6:6-11. Nganong kinahanglan natong balaanon ang adlaw'ng Domingo? Ang lihok sa Ginoo maoy atong panig-ingnan. Sama nga nihunong Siya sa pagtrabaho aron makapahulay sa ikapitong adlaw, kita usab mohunong sa mga naandang buluhaton sa adlaw'ng Domingo aron sa paghatag og pahulay sa kaugalingon, sa mga silingan ug sa kinaiyahan. Dugang pa niana, ang Domingo makahuloganon para kanatong mga Kristiyano tungod kay kini magpahinumdum sa pagkabanhaw sa Ginoo nga maoy timailhan sa kadaogan ug kaluwasan nga Iyang gikab-ot para kanatong tanan. Ang maong “pagpahulay” wala magdili kanato sa pagbuhat og maayo para sa uban. Gani, matag Domingo kita giawhag nga mosimba ug maghimo og buhat sa kalooy para sa isigkatawo.

Friday of the 22nd Week in Ordinary Time (Year C)

Lucas 5:33-39. Unsa may gipasabot ni Jesus sa iyang pag-ingon, “Walay tawo nga magsulod og bag-ong bino diha sa mga daang sudlanan nga panit”? Ang bag-ong bino mao ang mga pagtulon-an ni Jesus nga maghatag og tinuod nga kalipay sa mga tawo nga mosunod niini. Ang daang sudlanan mao ang kalibotanong panghunahuna ug kasingkasing.  Ang mga Pariseo ug mga magtutudlo sa Balaod naglisod sa pagsabot ug pagdawat kang Jesus tungod kay nagpabilin man sila sa ilang naandan nga paagi sa pag-ila ug pagsimba sa Dios nga inubanan og garbo. Aron nga ang pagtulon-an ni Jesus magmabungahon ug makapausab sa atong kinabuhi, kinahanglan nga ato unang biyaan ang atong naandang kalaog, garbo, ug tawhanong mentalidad ug pagbati. 

Thursday of the 22nd Week in Ordinary Time (Year C)

Lucas 5:1-11. Unsa may tuyo ni Jesus sa paghimo sa milagro sa dakong kuha sa mga isda? Ang sitwasyon ingon ani: Dihay bagang katawhan nga nag-alirong kang Jesus; dako kaayo ang ilang kauhaw sa Dios ug andam sila maminaw sa Iyang Pulong. Nakita ni Jesus kini nga dakong kahigayonan sa paghagit sa mga tinun-an kalabot sa ilang misyon sa kalibotan – “Sukad karon managat na kamot og mga tawo.” Kining misyon nga gibilin ni Jesus dili sayon. Bisan gani ang pagdala og usa ka tawo ngadto sa Ginoo lisod nang buhaton. Ang tinun-an nga managat og tawo makasinati og mga kapakyasan. Apan, ang milagro nga atong nadungog karon magpahinumdum kanato nga walay imposible kon anaa ang Dios. Mahimo nato ang pagdala og mga tawo ngadto Kaniya ug ngadto sa katarong.

Wednesday of the 22nd Week in Ordinary Time (Year C)

Lucas 4:38-44. Unsa may atong ikabalos sa kaayo sa Dios? Ang gugma sa Dios libre ug wala manginahanglan og balos. Mao kini ang hulagway sa tinuod nga gugma. Apan bisan tuod og dili magpabalos ang Dios, dalaygon gihapon para sa usa ka tawo kon siya makahimo og maayo para sa Ginoo. Diha sa ebanghelyo gihatagan kita og maayong panig-ingnan sa inahan ni Pedro. Human siya ayoha ni Jesus sa iyang hilanat, mibangon dayon siya ug misilbi sa Ginoo ug sa Iyang mga kauban. Ning panahona, ang mga kabos natong igsoon maoy nagdala sa presensya sa Dios. Kon gusto kitang magpasalamat Kaniya tungod sa mga grasya nga atong nadawat, himoon nato kini pinaagi sa pagsilbi sa mga pobre ug sa tanan nga adunay panginahanglan og tabang.

Tuesday of the 22nd Week in Ordinary Time (Year C)

Lucas 4:31-37. Kinsa man ang mas gamhanan – ang Dios ba o ang yawa? Ang mga karaang tawo sa Tunga-tungang Sidlakan adunay patoo-too nga kon mailhan ug mahinganlan nimo ang imong kaaway pwede nimo siyang tumbahon. Mao kini ang gisulayan paghimo sa yawa sa dihang kini misinggit sa makusog, “Jesus nga taga-Nazaret, unsay imong tuyo kanamo? Nakaila ako kinsa ka: ikaw mao ang balaang sulugoon sa Dios!” Wala tagda ni Jesus kining mga pulonga. Hinoon, gimandoan ni Jesus ang yawa (nga wala gani niya hinganli) sa paggula gikan sa tawo. Usa kini ka pagpakita sa gahom sa Dios batok sa yawa. Kini magdasig kanato sa pagsalig sa Dios ug sa pagsangpit Kaniya diha sa atong pagpakigbatok sa gahom sa daotan.

Monday of the 22nd Week in Ordinary Time (Year C)

Lucas 4:16-30. Unsa man ang misyon sa usa ka Kristiyano karong panahona? Pinaagi sa bunyag, kita gidihogan aron ipadayon ang misyon ni Cristo, nga karon nagpabilin nga susama niini: Pagdala sa Maayong Balita ngadto sa mga kabos, mga binilanggo, mga buta, mga nilutos ug sa tanan nga may panginahanglan. Si Santa Teresa sa Avila nagpahinumdum kanato nga ang Ginoo nagsalig gayod kanato: “Si Cristo, sa kalibotan karon wala nay lawas kondili ang imoha, walay kamot kondili ang imoha. Imoha ang mga mata nga iyang gamiton sa pagtan-aw sa kalibotan uban sa kalooy. Imoha ang mga tiil nga iyang gamiton sa paglakaw ug pagbuhat og maayo.” Ang atong misyon mao ang pagdala sa gugma ni Cristo ngadto sa mga tawo.