MONDAY OF THE 3RD WEEK IN ORDINARY TIME (YEAR B)

JUAN 2:13-25. UNSAON MAN NATO PAGTAGAD ANG MGA TAWO NGA DILI SAMA KANATO’G PAGTOO? Si Jonathan Swift nag-ingon: “We have just enough religion to make us hate, but not enough to make us love one another.” Nasulti niya kini tungod sa panag-away ug pagpinatyanay sa mga tawo tungod sa relihiyon. Ang mga relihiyon nga nagtudlo og gugma mao na hinoon ang hinungdan sa panagbingkil ug pagdumtanay sa mga tawo. Diha sa ebanghelyo, si Hesus naghisgot mahitungod kang propeta Elias nga gipadala sa Dios aron pag-atiman sa usa ka paganong biyuda ug kang propeta Eliseo nga gisugo aron pag-ayo sa pagano nga si Naaman. Dinhi gitudloan kita ni Hesus nga ang gugma sa Dios para sa tanan, dili lang para sa mga Hudiyo. Angay nga magrespetohay ang mga tawo, bisan lain-laig relihiyon, tungod kay ang tanan mga anak sa Dios.

SATURDAY OF THE 2ND WEEK OF LENT (YEAR B)

LUKAS 15:1-3, 11-32. UNSA MAY KALAINAN SA KASINGKASING NGA MALOLOY-ON UG SA KASINGKASING NGA MADINUMTANON? Diha sa sambingay, atong masabtan nga ang maloloy-ong kasingkasing modawat pagbalik sa usa ka makasasala nga maghinulsol, andam magpasaylo, dili manudya, ug dili manimalos. Ingon niini ang kasingkasing sa Dios. Sa laing bahin, ang madinumtanon dili makig-uli sa makasasala, kusog magkwenta, gustong mosilot ug manimalos. Dili ba ingon niini ang kasingkasing sa kadaghanan kanato? Sama kita sa magulang nga anak diha sa sambingay nga dili modawat sa igsoon nga nakasala, bisan kon kini nagbasol na. Matod pa sa panultihon, “It takes a strong person to say sorry, but it takes an even stronger person to forgive.” Ning kwaresma hatagan unta kita sa Dios og kaisog sa pagpasaylo sa atong isigkatawo.

THURSDAY OF THE 2ND WEEK OF LENT (YEAR B)

LUKAS 16:19-31. UNSA MAY MAKAPAHIMONG DAOTAN SA MGA ADUNAHAN? Sa sambingay ni Hesus, ang dato gisilotan dili tungod kay siya adunahan kondili tungod kay siya nabutahan sa bahandi nga iyang gihuptan. Ang dato wala may gihimong daotan ngadto kang Lazaro, apan wala usab siyay gibuhat nga maayo para ning makalolooy nga tawo. Ang iyang pagbaliwala sa tawo nga naglisod maoy nagdala kaniya ngadto sa dapit nga puno sa kasakit. Kining sambingay usa ka pasidaan sa mga adunahan. Kon ikaw magrasyahan, ayaw paghunahuna sa imong kaugalingon katagbawan lamang. Hunahunaa usab ang imong mga kabos nga silingan ug tabangi sila sa pagpangitag kabuhi-an. Nindot ang panultihon nga nag-ingon, “When God blesses you financially, do not raise your standard of living, raise your standard of giving.”

WEDNESDAY OF THE 2ND WEEK OF LENT (YEAR B)

MATEO 20:17-28. KINSA MAN ANG MAS HALANGDON, ANG GISILBIHAN O ANG NAGSILBI? Sa mata sa kalibotan, ang gisilbihan mao ang agalon, ang pangulo, o ang hari. Daghan ang nagtinguha nga mahimong dakong tawo aron maoy hangdon ug alagaran sa katawhan. Apan, lahi ang panan-aw sa Ginoo kabahin niini. Sa mga tinun-an nga nag-ambisyon sa labing halangdong pwesto, si Hesus nag-ingon: “Si bisan kinsa ang buot mahimong dako diha kaninyo magpakahimong inyong alagad.” Nga sa ato pa, ang nagsilbi, dili ang gisilbihan, maoy halangdon para sa Ginoo. Kitang tanan pwede nga mahimong dako tungod kay kada usa adunay katakos sa pag-alagad. Diha sa pagtabang sa uban, kalipay ang atong makaplagan. Sakto si Mahatma Gandhi sa iyang pag-ingon, “The best way to find yourself is to lose yourself in the service of others.”

TUESDAY OF THE 2ND WEEK OF LENT (YEAR B)

MATEO 23:1-12. SAYOP BA ANG PAGTAWAG SA USA KA TAWO OG “MAGTUTUDLO”, “AMAHAN”, UG “PANGULO”? Ang pagdili ni Kristo sa pagtawag ni bisan kinsa dinhi sa yuta nga “Magtutudlo”, “Amahan”, ug “Pangulo” usa ka paagi sa pagsulti o pagsulat nga gipalabi-an (hyperbole in English) aron sa pagtudlo og mahinungdanong mga punto. Dili tuyo ni Hesus nga bawalan kita sa pagtawag sa atong titser og “magtutudlo”, o sa atong tatay og “amahan”, o sa atong presidente og “pangulo” tungod kay kini ordinaryo man nga gibuhat sa mga tawo bisan sa iyang panahon. Ang iyang tumong mao ang pagsaway sa kinaiya nga nag-apas lamang sa mga titulo ug pasidungog nga kalibotanon, apil ang batasan nga mapasigarbohon ug mapahitas-on. Matud pa niya, “Ang labing dako kaninyo kinahanglang mahimo nga inyong sulugoon.”

MONDAY OF THE 2ND WEEK OF LENT (YEAR B)

LUKAS 6:36-38. KINSA MAN ANG TAWO NGA MALOLOY-ON? Kon maghisgot kita’g buhat sa kalooy, ang una natong mahunahunaan mao ang paghatag og limos, pagpakaon sa mga kabos, ug pagduaw sa mga masakiton. Apan ang ebanghelyo karon nagtudlo nga apil sa buhat sa kalooy mao ang dili paghukom ug pagkondena sa isigkatawo. Ang pagpasaylo usa ka buhat sa kalooy tungod kay pinaagi niini atong mahataga’g kalinaw ug bag-ong kahigayonan ang mga masalaypon. Adunay nag-ingon, “It takes a strong heart to love, but it takes an even stronger heart to continue to love after it's been hurt.” Ning Kwaresma gidapit kita nga mahimong maloloy-on. Pasayloon nato ang mga tawo nga nakasala kanato ug makighiuli kita kanila. Magmaloloy-on kita tungod kay ang Dios Amahan maoy unang nalooy ug nagpasaylo kanato.