TUESDAY OF THE 27TH WEEK IN ORDINARY TIME (YEAR B)

LUKAS 10:38-42. UNSAON MAN NATO PAGDAWAT UG PAGSILBI SI KRISTO DIHA SA ATONG KINABUHI? Atong masabtan sa ebanghelyo nga ang Dios buot mosulod dili lamang sa atong mga panimalay kondili diha sa atong kasingkasing. Ikalipay pag-ayo ni Kristo kon kita, sama kang Maria, modawat kaniya ug mohatag og panahon aron maminaw sa iyang mga Pulong. Mahimo nato kini pinaagi sa paggahin og mga tinakdang oras sulod sa adlaw aron mag-ampo, magbasa ug mamalandong sa Pulong sa Dios. Ikahimuot usab sa Ginoo kon kita, sama kang Marta, magsilbi kaniya pinaagi sa pag-alagad sa mga kabos ug mga nanginahanglan. Adunay nindot nga panultihon: “A good looking person works out to keep his/her body in shape. But a beautiful person kneels down in prayer to keep his/her heart in shape.”

MONDAY OF THE 27TH WEEK IN ORDINARY TIME (YEAR B)

LUKAS 10:25-37. HAIN MAN NING DUHA ANG MAS BILILHONG PANGUTANA: “KINSA MAN ANG AKONG SILINGAN?” O “UNSA MAN AKO NGA MATANG SA SILINGAN?” Ang una maoy gipangutana sa magtutudlo sa balaod. Daghan kanato mas mopili ning pangutanaha kay kini magtuki man sa laing mga tawo. Kinsa man ang akong silingan? Kinsa man kanila ang angay’ng higugmaon o kaloy-an. Ang ikaduhang pangutana nagagikan kang Kristo ug maoy Iyang gusto nga atong ipangutana sa kaugalingon. Unsa man ako nga matang sa silingan ngadto sa uban? Daghan kanato dili ganahan ning pangutanaha tungod kay kini maghagit man kanato sa pagtan-aw sa kaugalingon. Unsa man ako kamahigugmaon? Molihok ba ako aron pagtabang sa mga naglisod? Adunay nag-ingon, “Loving your neighbor means helping those in need even if they don’t live next door.”

27TH YEAR IN ORDINARY TIME (YEAR B)

Gn 2:18-24; Heb 2:9-11; Mk 10:2-16

Tungod sa ilang kaawayon, nakahukom kining magtiayon nga magbulag. “May pag magbulag ta kaysa mag-agwanta ko sa maot nimong batasan”, matud sa asawa. Ug mitubag ang bana, “O sige, bulag kon bulag.”

Tuod man, nagsugod sila pagbahinbahin sa tanan nga ilaha. Gibahin sab nila ang upat ka mga babaye'ng anak. Sanglit mga maot og panagway ang unang duha nila ka anak, gipili sa bana ang ikatulo ug ikaupat. “Kanang duha ka mga manghud ang ako”, matud pa niya. Apan miingon ang asawa, “Oy mao na ni ron, gipili pa gyud ang dili iyaha!”

Sa panahon ni Hesus, ang balaod sa mga Hudiyo nagtugot sa usa ka bana nga makigbulag sa iyang asawa bisan sa mabaw nga hinungdan. Pananglitan, mahimo nga bulagan sa bana ang iyang asawa kon kini dili magtarong sa pagluto, o kon kini mosukol sa iyang ugangan, o kon kini dili na makalipay kaniya. Gani, ang balaod nagtugot man sa bana nga mopalayas sa iyang asawa kon moangay siya og mas gwapa nga babaye. Para kang Hesus, kining maong balaod wala mahiuyon sa kabubut-on sa Dios dili lang tungod kay luoy ang mga babaye kondili tungod kay ang kaminyoon gimugna sa Ginoo nga malahutayon.

Dinhi sa Pilipinas, ang divorce nagpabiling ilegal, nga sa ato pa, wala itugot sa balaod. Sa Amerika ug sa daghang dapit sa kalibotan, legal ang pagpakigbulag sa mga magtiayon. Apan, bisan tuod legal ang divorce sa ubang mga dapit, nagpabilin kining imoral sa mga mata sa Dios ug sa atong Simbahang Katoliko.

Dili nato ikalimod nga bisan dinhi sa atong nasod, adunay mga tawo nga pabor sa divorce. Sa unsa mang mga rason? Adunay moingon nga “Ang tawo angay nga hatagan og laing kahigayonan kon masayop siya sa unang kaminyoon”. Ang uban mouyon sa divorce alang sa mga magtiayon nga dili na magkasinabut. Ingon pa nila, “Nganong pugson man nato pagpakig-uban ang duha ka tawo nga wala nay gugma sa usag-usa?” Naa puy mosuporta sa divorce alang sa magtiayon diin ang bana o asawa masakpan nga magbudhi sa iyang kapikas. “Unsa pa may bili sa kaminyoon kon mawad-an na ang magtiayon og pagsalig sa usag-usa?” matud pa nila.

Haloyo aning mga argumento pabor sa divorce, ang atong Simbahan nagpabiling supak niini. Ngano man?

Una sa tanan, ang atong Katolikong Pagtoo nag-isip sa kaminyoon nga usa ka sakramento, dili lang kontrata, nga pagahimoon sa usa ka lalaki ug babaye nga magkahigugmaay. Ang Ginoo maoy nagtukod sa sakramento sa kaminyoon, ug ang magtiayon nga mosulod niini makadawat og grasya nga maoy mosuporta kanila sa pagtuman sa mga responsabilidad sa kaminyoon. Isip sakramento, ang magtiayon maoy saksi sa gugma sa Dios para sa katawhan – gugma nga walay kinutoban, mapinanggaon, maamomahon, masinabtanon ug mapasayloon. Diha sa ebanghelyo, gipadayag ni Hesus ang labing unang plano sa Ginoo para sa kaminyoon: “Sa sinugdan, sa paghimo sa kalibutan, gihimo sila sa Dios nga lalaki ug babaye. Tungod niini ang lalaki mobiya sa amahan ug inahan aron makighiusa sa asawa. Ang duha mahimong usa ka lawas. Dili na sila duha kondili usa ka lawas. Busa, dili angay bulagon ni bisan kinsa ang gihiusa sa Dios.” Klaro kaayo nga, para kang Hesus, ang kaminyoon giplano sa Dios nga malahutayon. Kon atong tugotan ang divorce, ang kaminyoon dili na mahimong sakramento o hulagway sa walay kinutobang gugma sa Dios.

Ang laing bug-at nga rason ngano nga mobabag kita sa divorce mao ang kaugmaon sa mga anak, ug labot niini, ang kaugmaon sa katilingban. Ang mga bata manginahanglan og usa ka lig-on ug masaligan nga panimalay aron sila motubo nga himsog, malinawon ug malipayon. Sumala sa kasinatian, kalagmitan sa mga anak sa magtiayon nga nagkabulag mahimong problemado sa ilang pagdako, pag-eskuyla, pagpakigrelasyon ug sa pagpanarbaho. Ang kasakit nga ilang nasinati sa dihang nag-away ug nagbulag ang ilang mga ginikanan maoy hinungdan sa dili maayo nga pagtubo ning mga bataa. Daghan kanila magpabadlong ug maghupot og kasuko batok sa Dios, sa ginikanan, ug sa katilingban. Kasagaran, modako usab nga walay pagsalig sa kaugalingon ug sa isigkaingon. Kon walay maayo nga kapaingnan ang mga anak o kabataan, unsa naman ang kaugmaon sa atong katilingban?

Ning Domingoha mag-ampo kita alang sa mga kabatan-onan nga pangandaman nila og maayo ang pagsulod sa kaminyoon kon ugaling gitawag sila ning maong bokasyon. Dili unta nila isipon ang kaminyoon nga duladula ra, nga mahimo nilang biyaan kon ugaling dili na sila ganahan. Masabtan unta nila nga ang kaminyoon usa ka dakong gasa sa Dios nga nagtawag kanila sa paghigugma sa usa ka binuhat hangtod sa kamatayon. Adunay nag-ingon: “The best preparation for marriage is not only to choose the best spouse but it is also to work on being the ideal spouse for someone.”

Mag-ampo usab kita alang sa tanang mga magtiayon nga unta sila magpabiling mahigugmaon, masinabtanon ug mapasayloon sa usag-usa. Dili unta sila magpadaug sa mga tintasyon sa lawasnong kaulag ug sa mga kalibotanong butang nga maoy makadaot sa relasyon isip bana ug asawa. Nindot ang giingon: “A relationship will last not because it is destined to last. It lasts because two people chose to keep it, fight for it, and work for it.”

Sa katapusan, mag-ampo kita alang sa mga pamilya nga nadaot tungod sa panagbulag sa mga ginikanan. Sa ilang malisod nga kahimtang, mabati unta nila nga wala sila pasagdi sa Dios. Dili unta sila mawad-ag paglaum. Makakita unta sila og suporta ug kalipay diha sa mga tawo nga nagpabilin sa ilang kinabuhi, sama sa mga kaigsoonan, mga anak ug mga kahigalaan.

SATURDAY OF THE 26TH WEEK IN ORDINARY TIME (YEAR B)

LUKAS 10:17-24. UNSA MAY MAS MAHINUNGDANON – PASIDUNGOG SA KALIBOTAN O SA LANGITNONG GINGHARIAN? Ang 70 ka mga tinun-an namalik gikan sa usa ka misyon ug mahinangpong nagpahibalo kang Hesus mahitungod sa ilang nahimo. Unya, si Hesus miingon kanila: “Ayaw kamo paglipay niini tungod nga ang mga espiritu napailalom sa inyong gahom; hinonoa paglipay kamo nga ang inyong mga ngalan nahisulat didto sa kalangitan.” Pinaagi niini, gitudloan kita ni Hesus nga walay kalampusan ug pasidungog nga mahimong ibaylo sa ganti sa kinabuhing dayon. Nindot kini nga pahimangno tungod kay aduna ra bay mga tawo nga andam motalikod sa ilang prinsipyo ug mobuhat og dili maayo aron lang mapasidunggan sa katawhan. Hinumduman nato ang giingon, “True happiness is not found in any other reward than that of being united with God.”

FEAST OF THE GUARDIAN ANGELS

MATEO 18:1-5,10. KINSA MAN ANG MGA ANGHEL NGA MAGBALANTAY UG UNSA MAY ILANG PAPEL SA KALIBOTAN? Ang Simbahan nagtudlo nga matag anak sa Dios gibantayan og Anghel, sugod sa pagkahimugso hangtod sa kamatayon. Ang mga Anghel nga Magbalantay maoy magpadayag sa Diosnong gugma ug pag-amoma. Ang Salmo 91:11 nag-ingon nga “Ang Dios nagsugo sa Iyang mga Anghel aron magbantay kaninyo sa tanan ninyong pagabuhaton.” Sa gagmay pa kita, nakat-on kita sa pag-ampo: “Angel of God, my guardian dear. To whom God’s love commits me here. Ever this day be at my side, to light and guard, to rule and guide. Amen.” Gitudloan kita ni Hesus nga maghupot sa hiyas sa mga bata, ug angay lamang nga kita magpadayon sa pag-ampo sa “Anghel kong Magbalantay” matag adlaw.