FRIDAY OF THE 31ST WEEK IN ORDINARY TIME (YEAR B)

LUKAS 16:1-8. UNSA MAY KALAINAN SA MGA ANAK SA KALIBOTAN UG SA MGA ANAK SA KAHAYAG? Masayran nato kini pinaagi sa pagsusi sa duha ka butang: ang sentro ug ang tumong sa atong gibuhat. Kon ang atong hunahuna, pagbati ug kusog anaa ra nagpunting sa mga kalibotanong butang sama sa kwarta, negosyo, balay, sakyanan, malagmit nagpuyo na kita isip mga anak sa kalibotan. Apan, kon ang atong hunahuna, pagbati ug kusog anaa nakasentro sa mga espirituhanong butang sama sa paghigugma, pagtabang, pagpasaylo, ug pagmaki-angayon, malagmit nagkinabuhi na kita isip mga anak sa kahayag. Ang mga anak sa kalibotan magtinguha lamang og unsay ilang madawat para sa kaugalingon. Apan ang tumong sa mga anak sa kahayag mao ang ilang mahatag sa uban gikan sa ilang kaugalingon.

THURSDAY OF THE 31ST WEEK IN ORDINARY TIME (YEAR B)

LUKAS 15:1-10. UNSA MAY ATONG MAKAT-ONAN SA SAMBINGAY SA NAWALANG KARNERO? Ang sambingay naghulagway sa dakong gugma sa Dios alang sa mga makasasala. Sama sa maayong magbalantay nga mobiya sa 99 ka karnero aron pangitaon ang usa nga nahisalaag, ang Dios molihok aron pagkaplag sa usa ka makasasala. Ang matag tawo bililhon sa Dios; gusto Niya nga maluwas ang tanan. Kining sambingay magdasig kanato sa pag-ila sa atong pagkamasalaypon. Dili na kita magsigi’g tago. Likayan nato nga mahimong “self-righteous” sama sa mga Pariseo, nga nagpakaaron-ingnon nga sila hingpit ug walay sala. Adunay panultihon nga nagkanayon, “Cover your sin, God will expose it. Confess your sin, God will cover it.” Busa, angkonon, basolan ug ikumpisal nato ang atong mga sala aron kita pasayloon sa Dios.

WEDNESDAY OF THE 31ST WEEK IN ORDINARY TIME (YEAR B)

LUKAS 14:25-33. UNSA MAY GIPASABOT NI HESUS SA IYANG PAG-INGON NGA ANG MOSUNOD KANIYA KINAHANGLANG ANDAM MAGSALIKWAY SA IYANG GUGMA SA PAMILYA UG SA KAUGALINGON? Labing siguro, wala kini magpasabot nga atong kontrahon ang atong pamilya o daoton ang atong kaugalingon aron mahimong kristiyano. Gigamit sa ebanghelyo ang maong panultihon aron itudlo nga ang tanang relasyon ug gugma kinahanglang ipahiluna sunod sa atong gugma sa Dios. Si Hesus mao ang tinuod ug walay makatupong nga bahandi. Siya ang angay natong unahon tungod kay anaa kaniya ang kinabuhing madagayaon, kalinaw nga malungtaron, ug kalipay nga walay makatupong. Sakto ang giingon sa usa ka magsusulat, “When we put God first, all other things fall into their proper place.”

TUESDAY OF THE 31ST WEEK IN ORDINARY TIME (YEAR B)

LUKAS 14:15-24. UNSA MAY HINUNGDAN SA ATONG PAGBALIBAD SA MGA PAGDAPIT SA DIOS? Diha sa sambingay, ang unang dinapit sa hari nibalibad tungod kay aduna siyay susihon sa iyang napalit nga yuta. Mas gi-una niya ang trabaho kaysa kombira sa hari. Pangutana: Gitugotan ba usab nato ang atong trabaho o negosyo nga makapalayo nato sa Dios? Ang ikaduhang dinapit nibalibad tungod kay nakapalit siyag 5 ka parisan nga mga baka. Gipalabi niya ang kabtangan kaysa pagpakig-uban sa hari. Pangutana: Gitugotan ba usab nato ang mga materyal nga butang nga makababag sa atong pagpaduol sa Dios? Ang ikatulong dinapit nibalibad tungod kay bag-o lang siyang nangasawa. Mas importante niya ang iyang kapikas kaysa hari. Pangutana: Nakababag ba usab nato ang atong pamilya sa pagsunod sa kabubut-on sa Dios?

ALL SOULS DAY (YEAR B)

Kaalam 4:7-14; 1 Corinto 15:51-57; Juan 11:21-27

“1 week na lang ang tagal sa imong kinabuhi busa pangandam na”, matud sa doktor.

Nakurat ang pasyente ug miingon, “1 week? Unsaon man nako pagbayad sa akong bayronon nimo dok nga wala naman koy panahon sa pagpangitag kwarta?”

Ug miingon ang doktor, “Kon mao kana, tagalan ta kag 1 month, dili na 1 week.”

Ang “Adlaw sa mga Patay” o “Kalag-kalag” magpahinumdum kanato sa kahamubo sa kinabuhi sa tawo ug magdasig kanato sa pagpangandam alang sa pag-abot sa kamatayon. Adunay kalainan ang panan-aw sa mga kalibutanong tawo ug sa mga magtotoo ni Kristo kalabot ning mga butanga.

Ang kalibutanong hunahuna magtoo nga magdugay pa kita ning kalibutan. Dasigon kita sama niini: Pagtrabaho’g maayo, pagtigum og daghang kwarta, ug pagtukod og dagkong mga balay. Pahimulos sa imong kabatan-on; unya na pagdiniyos kon matigulang na ka. Tagbawa ang imong kaugalingon sa mga butang kalibutanon samtang baskog pa; unya na pagserbisyo sa simbahan kon magretiro na ka.

Adunay kalibutanong hunahuna nga makasabut sa kahamubo sa kinabuhi, apan susama ra ang ilang prinsipyo sa nahiuna. Agnihon kita sama niini: Pahimulos og lingawlingaw kay dili ra ba ka magdugay dinhi sa kalibutan. Suroy, kaon, ug inum sa walay pugongpugong samtang buhi pa ka. Walay pahulay-pahulay; unya na pagpahulay kon patay na ka.

Ang mga tawong kalibutanon mahadlok motan-aw sa umaabut; dili sila ganahan mamalandong sa unsay mahitabo inig katigulang na nila. Labaw silang mahadlok maghunahuna sa adlaw sa ilang kamatayon ug sa unsay mahitabo human niini. Kasagaran, ang mga tawong kalibutanon magpuyo nga mahadlokon, matigulang nga masulub-on, ug mamatay nga walay preparasyon.

Sa laing bahin, ang mga magtotoo ni Kristo nakasabot nga ang kinabuhi sa tawo gasa sa Dios. Matag adlaw, matag minuto, matag segundo isipon nila nga gasa sa Dios. Ug tungod kay gasa man kini sa Dios, gamiton nila kini sa maayo sumala sa Iyang kabubut-on. Dili nila kini abusaran, dili usab nila kini usikan.

Ang mga magtotoo nakasabot nga ang Dios lamang maoy magbuot asa ug kanus-a ra kita kutob ning kalibutan. Nasayod sila nga ang kinabuhi sa tawo dinhi sa kalibutan mubo ra. Ang 60, 70, o 80 anyos daw kagahapon lang. Nakasabot sila sa giingon sa Balaang Kasulatan: Ang tawo sama sa sagbot, moturok inig kabuntag, mobuswak inig kaudto, ug malawos inig kahapon.

Ang kamubo sa kinabuhi makapabalaka sa tawong kalibutanon, apan dili sa mga tawong matoohon. Ang mga sumusunod ni Kristo nakasabot sa iyang gipamulong: “Ang motoo kanako dili mamatay kondili makabaton sa kinabuhing dayon”. Gihimo ang tawo para makig-uban sa Dios, dili aron magpabilin ning kalibutan. Ang mga magtotoo mangandam dili lang para ning kinabuhia kondili para sa gingharian nga giandam sa Dios alang kanila.

Ang mga magtotoo ni Kristo maghatag og bili sa matag segundo sa ilang kinabuhi. Dili nila usikan ang mga adlaw sa pagpakig-away, pagpakigdumot, ug pagpakigbungol sa mga igsoon ug silingan. Dili nila kawangon ang daghang oras sa pagsugal, pag-inum, ug pagbuhat og daotan. Hinoon, gamiton nila ang matag panahon sa mga butang nga makahuluganon sama sa pag-alagad sa usag-usa, paghigugmaay, pagpinasayloay ug uban pa.

Miabot ang anghel sa kamatayon sa tungang gabii aron kuhaon ang usa ka 50 anyos nga dato. Sa kalisang, ang adunahan midiskarte sa anghel sa kamatayon sa pag-ingon: “Ihatag nako kanimo ang usa ka milyon, pero hatagi sa kog usa ka semana aron ipahiluna ang akong negosyo.” Apan, ang anghel mitubag, “Panahon na nimo, wala na tay mahimo.”

“Ihatag nako ang katunga sa akong katigayonan, hatagi lang kog usa ka adlaw aron makighiuli sa akong mga igsoon nga nakaaway”, nagpakilooy ang negosyante. Apan, ang anghel mitubag, “Panahon na nimo, wala na tay mahimo.”

Unya mihirit pa gyod ang negosyante sa pag-ingon, “Ihatag nako kanimo ang tanan kong bahandi, hatagi lang kog usa ka minuto aron mangayog pasaylo sa Ginoo.” Apan, ang anghel mitubag, “Panahon na nimo, wala na tay mahimo. Let's go!”

Ang tinuod nga mga magtotoo dili maghulat og ugma aron makighiuli sa kaaway. Dili sila maghulat og matigulang para magtinarong. Dili sila maghulat nga masakit para magbag-o sa batasan. Dili sila maghulat nga moretiro para moserbisyo sa Ginoo. Kon duna silay gusto nga buhaton para sa Dios ug sa isigkatawo, himoon nila kini karon, dili ugma pohon.