SATURDAY OF THE 32ND WEEK IN ORDINARY TIME (YEAR B)

LUKAS 18:1-8. NGANONG ANGAY MAN KITANG MAGMAKANUNAYON SA PAG-AMPO? Sa sambingay, ang huwes walay kahadlok sa Dios ni pagtahod sa isigkatawo. Apan mihatag siya sa gipangayo sa biyuda tungod kay nagbalikbalik man kini kaniya. Pinaagi ning hamubong sugilanon, gidasig kita ni Hesus sa pagmakanunayon sa pag-ampo. Ang makanunayong pag-ampo usa ka pagpadayag sa dakong pagtoo. Matud pa sa usa ka magsusulat: “Faith is not belieiving that God can; it is knowing the He will.” Kon kita mangayo sa Dios og usa ka butang nga makaayo ug matarong, dili gayod kita niya balibaran. Dili lang kay Iya kining mahimo kondili Iya gayong himoon tungod sa dakong gugma para kanato. Ang Dios usa ka mahigugmaong Amahan, dili sama sa huwes nga walay balatian. Tubagon Niya ang tanan natong pag-ampo sa tukmang panahon.

FRIDAY OF THE 32ND WEEK IN ORDINARY TIME (YEAR B)

LUKAS 17:26-37. UNSAON MAN KITA PAGHUKOM SA GINOO INIG ABOT SA PANAHON? Gihulagway ni Hesus ang maong panahon pinaagi sa pag-ingon: “Niadtong gabhiona, may duha ka tawo nga magdulog sa higdaanan; kuhaon ang usa ug ang usa ibilin.” Pinaagi ning panultihon gitudloan kita nga matag tawo manubag sa iyang kaugalingon atubangan sa Ginoo. Dili nato mahimong ipasa ang maong responsabilidad ngadto sa uban. Nindot kini nga pahimangno tungod kay adunay mga tawo nga magpasagad lang ug magsalig nga maluwas tungod sa katarong ug kamaampoon sa ilang mga ginikanan, kapikas, o kaha kaigsoonan. Sayon ra nga moingon, “I-apil lang ko og ampo” o “Ikaw lay pagbinuotan para nako”. Sayop! Sa Adlaw sa Paghukom, ang atong binuhatan maoy susihon sa Ginoo, dili ang sa uban.

THURSDAY OF THE 32ND WEEK IN ORDINARY TIME (YEAR B)

LUKAS 17:11-19. NGANONG ANGAY MAN KITANG MAGPASALAMATON? Giayo ni Hesus ang napulo ka sanglahon nga nagpakilooy kaniya. Apan niining napulo, usa lamang ang nibalik aron sa pagpasalamat sa Ginoo. Tungod niini nakapangutana si Hesus, “Dili ba napulo man ang nangaayo? Hain naman ang siyam?” Gipangita ni Hesus ang siyam dili tungod kay nanginahanglan siya’g pagdayeg kondili tungod kay nahibalo siya unsa ang maayong pamatasan. Kinahanglan nga magpasalamat ang tawo tungod kay ang pagkamapasalamaton usa ka hiyas nga makapadasig sa katilingban. Diha sa pagpasalamat, atong gidawat nga kita nanginahanglan sa usa’g-usa ug nga kita nalipay sa pagtinabangay. Adunay panultihon nga nag-ingon, “It is not happy people who are thankful; it is thankful people who are happy.”

DEDICATION OF THE BASILICA OF ST. JOHN LATERAN

JUAN 2:13-22. NGANONG SAGRADO MAN ANG BALAY ALAMPOANAN? Si Hesus mismo ang nagtawag sa templo nga “Balay sa iyang Amahan”. Nasuko siya sa dihang iyang nakita ang mga tawo didto sa templo nga namaligya og mga hayop ug nangilis og mga kwarta tungod kay para kaniya usa kini ka pagpanamastamas sa Balay sa Dios. Ang templo usa ka sagradong lugar; dinhi ang mga tawo mag-ampo ngadto sa ilang Langitnong Amahan. Dili kini sama sa merkado nga mahimo ang pagsaba-saba, pagpangwarta ug pagpamintaha. Kining ebanghelyo magpahimangno kanato sa paghatag og dakong pagtahod sa matag Simbahan o Balay Alampoanan. Ampingan nato ang iyang kahilom ug kalimpyo. Mosulod kita niini uban ang saktong linihokan, pamiste, hunahuna ug pagbati.

32ND SUNDAY IN ORDINARY TIME (YEAR B)

1 Hari 17:10-16; Hebreo 9:24-28; Marcos 12:38-44

Duha ka byuda ang nahimong bida sa mga pagbasa karong Domingoha.

Diha sa unang pagbasa, si propeta Elias nangayog tubig ug pan sa usa ka byuda nga iyang nakita nga namunit og lipak. Dihay dakong kagutom atong lugara ug usa na lang ka kan-anan ang nahibilin para sa maong byuda ug sa iyang anak nga lalaki. Apan bisan sa maong kahimtang, ang maong byuda wala modumili sa pagtabang sa propeta nga gigutom. Mitoo siya sa pulong sa propeta nga ang Dios maoy maghatag kanila og probiso ning panahon sa kagutom. Ug tuod man, ang iyang garapon wala mahutdi sa harina ug ang iyang botelya wala mahubsi sa lana hangtod nga natapos ang huwaw sumala sa giingon ni Elias. Ang byuda nakasinati nga ang Dios dili gayod magpasagad sa tawo nga magbuhat og maayo.

Ang ebanghelyo nagsaysay mahitungod sa laing byuda nga mihalad og duha ka dako didto sa panudlanan sa templo. Para kang Hesus, dalaygon kaayo kining maong byuda tungod kay “gihatag niya ang tanan nga iyaha, ang iyang kabuhian”. Mas bililhon ang halad ning byuda tungod kay naghatag siya gikan sa iyang kakabos, samtang ang kadaghanan naghatag sa ilang mga sobra. Nakita ni Hesus ang pagkamatinud-anon sa byuda diha sa iyang paghalad og sakripisyo sa templo, usa ka butang nga wala niya makita sa uban. Para kang Hesus, ang mga hinalad sa mga magtutudlo sa Balaod walay bili tungod kay sila mga tigpakaaron-ingnon ug daotan ang ilang binuhatan.

Ang kaayo nga gibuhat ning duha ka byuda makapatandog gayod ilabina kon masabtan nato ang ilang ubos nga kahimtang diha sa katilingban. Sa kultura sa mga hudiyo, ang asawa walay kaugalingong katungod; magsalig lamang siya sa iyang bana. Nga sa ato pa, ang usa ka byuda mawad-an dili lamang sa usa ka bana kondili sa tawo nga iyang gisandigan. Ngano nga nagpabilin man sila nga maayo ug manggihatagon sa isigkatawo ug sa Ginoo taliwala sa ilang kapobrehon? Walay sayon nga tubag ning maong pangutana, apan nasayod kita nga adunay mga tawo nga maayo gayod og kabubut-on bisan sa kalisod sa ilang sitwasyon.

Gipasundayag sa usa ka TV program ang usa ka babaye nga volunteer sa relief operation para sa mga biktima sa bagyo. Nahinungan kining maong babaye tungod kay siya usa usab ka biktima sa bagyo ug nagpuyo na karon sa evacuation center. Ang babaye gipangutana: “Unsa may nakadasig nimo sa pagtabang sa relief operation nga ikaw biktima man usab sa bagyo?” Ug ingon niini ang iyang tubag: “Una, angay ako magpasalamat sa Dios tungod kay bisan nawad-an akog balay ug mga kabtangan, ania buhi pa ako. Dili ba mas importante ang kinabuhi kaysa mga butang? Ikaduha, tinuod naglisud ako, apan mas grabe pa ang kalisud sa uban. Daghang mga tawo ang mas tabangonon pa kay kanako.”

Ang maong babaye usa ka tinuod nga sumusunod ni Kristo. Nasayod siya unsa ang mas mahinungdanon sa kinabuhi; nasayod siya nga ang mga kalibutanong butang dili angay pakamatyan. Sama sa duha ka byuda ug sama kang Kristo, kining maong babaye makamao nga malimot sa iyang kaugalingon aron sa pagtabang sa uban. Samtang nagtan-aw ako sa maong babaye didto sa TV, akong nakita kaniya ang panagway sa tawo nga malinawon ug malipayon. Tinuod gayod ang giingon ni Hesus: “Ang mawad-an sa kinabuhi tungod kanako, makakaplag hinuon niini” (Mateo 10:39).

Pamalandong nato kini:

1. Asa man kutob ang atong pagkamanggihatagon? Motabang ba kita bisan sa atong kawad-on o motabang lamang kita panahon sa kahamugaway?
2. Unsa man ang atong gihalad sa Ginoo – ang salinsalin sa bahandi o ang tibuok kinabuhi?
3. Asa man gikan ang atong gidalang halad sa simbahan - sa maayo o sa daotan nga binuhatan?

SATURDAY OF THE 31ST WEEK IN ORDINARY TIME (YEAR B)

LUKAS 16:9-15. KINSA MAN ANG NAGHARI SA ATONG KINABUHI – DIOS O BAHANDI? Ang tawo nga gihari-an sa bahandi magsigi la’g hunahuna kon unsaon pagpadaghan ang iyang kwarta ug kabtangan. Wala siyay panahon sa Ginoo, sa kaugalingon, ug sa isigkatawo. Tungod kay gusto siyang madato, dili niya batasan ang pagtabang sa nanginahanglan. Samtang ang tawo nga giharian sa Dios magsigi’g hunahuna kon unsaon pagpasidungog ang iyang Magbubuhat. Bisan tuod nanginabuhi, aduna siyay igong panahon para sa pag-ampo, pagpahulay ug pagpakighigalaay. Nasayod siya nga ang bahandi lumalabay lamang ug dili angay’ng pakamatyan. Gamiton niya kini sa sa pag-alagad sa Dios, sa isigkaingon, ug sa kaugalingon. Sakto ang gisulti ni Margaret Thatcher, “It is not the creation of wealth that is wrong, but the love of money for its own sake.”