5TH SUNDAY IN ORDINARY TIME (YEAR C)

Is 6:1-2, 3-8; 1 Cor 15:1-11; Lk 5:1-11

Karong Domingoha gipahinumduman kita mahitungod sa atong papel diha sa plano sa Ginoo para sa kalibutan. Kitang mga binunyagan, bisan unsa ang atong kahimtang o trabaho, adunay bahin sa ministeryo ni Kristo.

Kasagaran sa mga tawo nga hagiton sa pag-alagad sa Simbahan moingon dayon, “Kamo lang ana brod kay dili ko takos nga mahimong alagad”. Kinsa man diay ang angayan nga mahimong alagad sa Dios? Sa pagkatinuod lang, walay bisan usa kanato nga angayan tungod kay kitang tanan makasasala man. Diha sa unang pagbasa, si propeta Isaias nakakita sa iyang kahugaw ug gusto siya nga mobalibad sa tawag sa Ginoo. Si Pablo usab, sa ikaduhang pagbasa, nasayod nga dili siya angay nga tawgon og apostoles tungod kay gilutos niya ang mga Kristiyano kaniadto. Unya, diha sa ebanghelyo, si Pedro naulaw pag-ayo ug midawat sa iyang pagkamakasasala atubangan ni Kristo. Apan, haloyo sa pagkamakasasala ning tulo, ang Dios naghimo kanila nga magsasangyaw ngadto sa mga tawo. Pinaagi niini, kita gipasabot nga ang grasya sa Dios mas dako pa kaysa atong pagkamakasasala. Si San Pablo nag-ingon, “Pinaagi sa grasya ako nahimong ingon ani; ug ang grasya sa Dios dili gayod magkulang o mapakyas.”

“Ayaw nag kabalaka”, si Hesus miingon kang Pedro, “Sugod karon ikaw managat na og mga tawo.”   Ang trabaho nga gisangon kanato ni Kristo mao ang pagkahig og mga tawo para sa Gingharian. Ang pagpanagat dili sayon nga trabaho. Usahay makakuha ka og daghang isda; usahay usab wala. Ang mangingisda kinahanglan adunay dako nga pasensya; kinahanglan makamao siya nga maghulat. Ingon usab niini ang pagpanagat og mga tawo para sa Dios. Malisod ang pagdala sa mga tawo ngadto sa Simbahan. Dili sayon ang pagkabig kanila ngadto sa katarong. Kinahanglan kini og dako nga pasensya. Bisan gani sa atong mga anak maglisod kita sa pagtudlo og unsay maayo. Kinahanglan nato nga maghatag kanila og igong panahon aron sila makat-on.

Usa ka epektibo nga pamaagi sa mga mangingisda sa ilang pagpanagat mao ang pagdala og mahayag nga lampara. Ang kusog nga kahayag sa lampara mao ang makadani sa mga isda padulong sa pukot sa mananagat. Diha sa pagpanagat og mga tawo, importante usab ang kahayag nga atong dalhon sa atong kinabuhi. Ang kahayag sa maayong binuhatan maoy makadani sa mga tawo sa pagsunod kanato diha sa dalan nga magdala ngadto kang Kristo. Kon wala kanato ang kahayag, kon wala kitay maayong ehemplo, wala usab kitay madala nga mga tawo ngadto sa Ginoo.

Pamalandongan nato kini:

1. Asa man dapita sa katilingban kita gitawag sa Dios nga managat og mga tawo – sa panimalay, sa opisina, sa tulonghaan, o sa merkado?

2. Unsa may angay natong buhaton aron mahimong epektibong mananagat og mga tawo?

SATURDAY OF THE 4TH WEEK IN ORDINARY TIME (YEAR C)

MARCOS 6:30-34. NGANONG IMPORTANTE MAN ANG PAGPAHULAY DIHA SA KAHILOM? Human sa malampuson nga pagsangyaw, ang mga apostoles giingnan ni Hesus: “Mangadto kita sa dapit nga awaaw aron makapahulay kamo’g diyotay.” Isip lawasnon, kinahanglan natong hatagag panahon nga makapahulay ang atong lawas aron maandam sa sunod nga mga buluhaton. Kon dili kita mohunong sa pagtrabaho, dako ang purohan nga masakit kita ug maluya. Isip espirituhanon, angay usab natong papahulayon ang atong utok ug kasingkasing aron kini mahiluna diha sa Dios. Diha sa kahilom ug sa pag-ampo, atong masinati ang kalinaw ug masabtan ang kabubut-on sa Ginoo para kanato. Kini ang pahimangno ni Mother Teresa: “God speaks in the silence of our heart. Listening is the beginning of prayer.”

FRIDAY OF THE 4TH WEEK IN ORDINARY TIME (YEAR C)

MARCOS 6:14-29. UNSA MAY ATONG MAKUHA SA PAGBAROG SA KAMATUORAN? Si Juan gipatay tungod sa iyang paglaban sa kamatuoran. Iyang giingnan si Hari Herodes nga ang iyang pagpakigpuyo kang Herodias usa ka dakong sala tungod kay kini asawa man sa iyang igsoon. Dili matarong para sa usa ka tawo, bisan og hari siya, ang pagpanapaw. Human sa daghang katuigan, ang espiritu ni Juan nabuhi og balik sa usa ka tawo nga ginganla’g Thomas More. Sama kang Juan, gipatay siya tungod sa iyang pagsulti sa tinuod. Gisaway niya ang pagpakasal ni King Henry VIII kang Anne Boleyn tungod kay aduna man siyay buhing asawa nga si Katerina. Sa pagbarog sa kamatuoran, si Juan ug si Thomas More gipatay, apan nadawat nila ang dakong ganti sa langit. Nindot ang panultihon: “People can’t change the truth but the truth can change people.”

THURSDAY OF THE 4TH WEEK IN ORDINARY TIME (YEAR C)

MARCOS 6:7-13. NGANONG GIDID-AN MAN NI HESUS ANG MGA TINUN-AN SA PAGDALA’G DAGHANG BUTANG SA ILANG PAGSANGYAW SA MAAYONG BALITA? Dili ikalilong nga ang mga materyal nga butang makatabang sa atong kinabuhi. Apan nasayod usab kita nga ang mga butang ning kalibotan makababag sa atong mga buluhaton para sa Dios ug sa isigkaingon. Daghan kanato dili na mag-ampo tungod kay sigi’g tan-aw sa salida sa TV; daghan dili na mag-estoryahanay tungod kay sigi’g tuslok-tuslok sa cellphone. Ang uban mabuta sa bahandi ug mahimong mapahitas-on. Nasayod usab kita nga ang kabtangan usahay maoy hinungdan sa panag-away sa managsoon ug managhigala. Adunay nag-ingon: “If material things are what you’re talking about when you say ‘I’m blessed’, you have no idea what a blessing is.”

FEAST OF SAINT BLAISE, BISHOP AND MARTYR

MARCOS 5:21-43. UNSA MAY KALAMBIGITAN SA DEBOSYON KANG SAN BLAS UG SA MGA TUTONLAN? Si San Blas usa ka buotan nga obispo sa Sebaste, Armenia niadtong ika-4 nga siglo. Nabilanggo siya resulta sa pagpanglutos nga gihimo sa mga paganong Romano, ubos sa pagmando ni Emperador Licinius. Kalabot sa sugilanon sa kinabuhi ni Blas mao ang iyang pag-ayo sa bata nga naglisod og ginhawa tungod sa dakong bukog sa isda nga nakababag sa iyang tutunlan. Tungod niini, adunay namugna nga debosyon sa pag-ampo kang San Blas alang sa kaayohan sa mga sakit sa tutunlan. Bililhon kining maong debosyon tungod kay daghan kanato adunay mga balati-an sa tutunlan, ilabina ning tingtugnaw nga panahon. Gawas pa niana, daghan usab nga mga tutunlan ang nanginahanglan og kaayohan tungod sa mga daotang pulong nga magsigig agi niini.

FEAST OF THE PRESENTATION IN THE TEMPLE (YEAR C)

LUKAS 2:22-40. UNSA MAN ANG MENSAHE NING KAPISTAHAN SA PAGHALAD SA BATANG HESUS DIDTO SA TEMPLO? Karong adlawa gipahinumduman kita nga matag bata nga mahimugso ning kalibotan nagagikan sa Dios. Ang bata usa ka bililhong gasa nga madawat sa mga ginikanan; usa usab kini ka dakong responsabilidad nga gisangon kanila sa Dios. Sama nga si Jose ug Maria naghalad sa batang Hesus ngadto sa templo, ang mga ginikanan gidasig sa paghalad sa ilang mga anak ngadto sa Dios uban sa pag-ampo: “Ginoo, among ihalad Kanimo ang bata nga Imong gihatag kanamo aron mahimo namong anak. Kami maningkamot, uban sa imong panabang, sa paghatag kaniya og maayong pagtulon-an ug panig-ingnan aron siya mahisama kang Kristo nga motubo sa kusog, kaalam, ug grasya. Amen.”