FRIDAY OF THE 1ST WEEK IN ORDINARY TIME

MARCOS 2:1-12. UNSA MAY MAKAPARALISA SA TAWO? Sa lawasnon nga aspeto, ang tawo mawad-ag kusog sa paglihok kon siya mabali-ag bukog, masudla’g “deadly virus”, o kaha, makasinati’g “stroke”. Apan ang paralisa dili lamang lawasnon kondili espirituhanon usab. Ang tawo maparalisa sa espiritu kon kini mapuno sa sala. Ang daotang kinabuhi ug ang salang mortal maoy hinungdan nga ang tawo dili na motubo ug molambo sa iyang emosyonal ug espirituhanong kinabuhi. Tungod sa sala, maguba ang iyang relasyon sa Ginoo ug sa isigkatawo. Diha sa ebanghelyo, ang paralisado nga tawo giingnan ni Hesus, “Ang imong mga sala gipasaylo na. Bangon, dad-a ang imong gihigdaan ug lakaw.” Sakto ang mensahe sa usa ka caption nga nag-ingon: “Sins can tie up your life; Jesus can clip you free.”

THURSDAY OF THE 1ST WEEK IN ORDINARY TIME

MARCOS 1:40-45. TINUOD BA NGA ANG SAKIT USA KA SILOT GIKAN SA DIOS? Sa panahon ni Hesus ang mga sanlahon giisip nga hugaw kaayo ug dakong makasasala. Ang ilang kahimtang gitan-aw nga silot gikan sa Dios. Gidid-an sila nga moduol sa mga tawo aron dili makatakod ug dili makahimong hugaw sa uban. Apan si Kristo wala mosunod ning maong mentalidad. Gani, gitugotan niya ang usa ka sanlahon nga moduol kaniya. Iya kining gihikam ug giayo sa iyang sakit – usa ka pagpakita nga ang sanlahon wala isalikway sa Dios. Nindot kini nga mensahe alang sa mga masakiton. Dili nila angay’ng isipon nga sila gipanghimara-ot sa Ginoo. Kon duna man silay sala, mangayo sila’g pasaylo. Apan, hunahunaon nila nga sila duol sa kasingkasing sa Dios ug gusto niya nga sila mapasaylo ug mamaayo.

WEDNESDAY OF THE 1ST WEEK IN ORDINARY TIME

HEBREO 2:14-18. MAKASABOT BA KAHA ANG DIOS SA KAHIMTANG SA TAWO? Usahay dili malikayan nga makapangutana kita niini, ilabina sa mga panahon nga kita hari-an sa atong pagkatawhanon. Pananglitan, masabtan ba kaha sa Dios nga usahay init ang atong ulo tungod kay aduna kitay gibati sa lawas, o tungod kay daghan kitag problema? Masabtan ba kaha sa Dios nga dili kita makapasaylo dayon tungod kay kita nasakitan pag-ayo sa gibuhat sa laing tawo? Ang Sulat ngadto sa mga Hebreo nagtudlo nga ang Ginoong Hesus makasabot sa atong kahimtang ug gusto niya kitang tabangan. Gipili niya nga mahimo siyang sama kanato sa tanang paagi, gawas sa pagpakasala, aron mahimo siyang panig-ingnan sa kamatinumanon ug kamaloloy-on. “Because he himself suffered when he was tempted, He is able to help those who are tempted.”

SOLEMNITY OF THE EPIPHANY OF THE LORD

Is 60:1-6; Eph 3:2-3, 5-6; Mt 2:1-12

Sa Bag-ong Kasabotan adunay upat ka tawo nga ginganlag Herodes. Kining Herodes nga gihisgotan sa ebanghelyo karon mao si Herod the Great, kang kinsang kabantog naila diha sa iyang pagsugo sa pagpatay sa mga inosenteng bata. Si Hari Herodes usa ka tawo nga laog sa gahum. Nabalaka siya kanunay nga adunay mopuli sa iyang trono. Tungod niini, nahimo niyang patyon bisan ang mga sakop sa iyang pamilya.

Si Herodes usa ka tawo nga naghunahuna lamang sa iyang kaugalingong interes. Kini maoy hinungdan sa iyang walay kwentang kahadlok. Naghunahuna siya nga pinaagi sa pagpabiling hari, maiya ang kalibotan ug ang kalipay. Apan, ang iyang kalaog mao hinoon ang nagdala kaniya og kabalaka ug kagul-anan.

Sukwahi kang Herodes, ang tulo ka halangdong tawo gikan sa sidlakan mga  mapaubsanon ug mahadlokon sa Dios. Ang tradisyon miila kanila nga mga hari nga nagdala sa pangalang Gaspar, Melchor ug Balthazar. Ang ebanghelyo wala moingon nga sila mga hari ug nga sila tulo ka buok. Tingali ang tradisyon naghunahuna nga adunay tulo ka hari tungod sa tulo ka mga mahalong gasa nga gihalad para sa natawong Bata – bulawan, insenso ug mira. Ang mga batid sa Bibliya karon nagtudlo nga kining tulo dili mga hari kondili mga astrologers o mga maalamong tawo nga nagtoon sa mga bitoon aron pagsabot ug pagpanagna unsay mahitabo sa kalibotan.

Ang tulo ka dumuduong puro maalamaon, apan ang ilang kalantip sa hunahuna giubanan og kamapaubsanon ug kamasinugtanon. Gani, nagpakita sila og kaikag nga mosunod sa giya sa usa ka dakong bitoon, nga niadtong tungora giisip nga ilhanan gikan sa kahitas-an.  Lahi kang Herodes, kining tulo wala magtan-aw sa ilang kaugalingon lamang. Miila sila nga adunay Labaw'ng Makagagahum, ug tungod niini, mibiya sila sa ilang mga lugar aron sa pagpangita sa Dios.

Si Herodes nangita sa Bata aron kini iyang patyon; ang tulo ka maalamon gustong makaplagan ang Bata aron ilang simbahon. Tungod kay mipili sila nga moalagad sa tinuod nga Hari, ang tulo nakaangkon sa kalipay nga ilang gipangandoy. Ang ebanghelyo klaro kaayo nga miingon: “Nalipay sila pag-ayo sa pagkakita nila sa bitoon, ug sa ilang pagsulod nakita nila ang Bata uban sa Iyang inahan.”

Ang solemnidad sa Epipaniya magpahinumdum kanato nga si Jesus mao ang gugma sa Dios Amahan nga gipadayag sa kalibotan. Siya mao ang Manluluwas dili lamang sa mga Hudiyo, kondili sa tanang katawhan, nga gisimbolo sa mga dumuduong gikan sa sidlakan. Diha lamang kang Jesus kita makaangkon og tinuod nga kinabuhi ug kalipay. Karong adlawa, kita gihagit sa pagsunod sa panig-ingnan sa tulo ka maalamon nga nagpabiling mapaubsanon, nga mibiya sa ilang daang kinabuhi aron sa pagpangita sa Kahayag. Nakaplagan sa mga  maalamon si Jesus dili sa usa ka palasyo, kondili sa pasongan. Kini magtudlo kanato nga ang Dios dali ra makit-an sa mga ordinaryong dapit diin ang mga simpleng tawo gidawat, diin walay tawo nga gidaugdaug, ug diin ang gugma ug pagtinagdanay maoy maghari.

Pamalandongan nato kini:

1.             Asa man kita nagpadulong sa atong panaw ning kinabuhia – sa kaugalingon ba (sama kang Herodes) o sa Dios (sama sa mga mago)?

2.             Unsa may angay natong buhaton aron makaplagan ang Dios – maglinaog ug magpahangad ba (sama kang Herodes) o magmangihatagon ug magmapaubsanon (sama sa mga mago)?

JAN 2 WEEKDAY OF THE CHRISTMAS SEASON

JUAN 1:19-28. UNSAON MAN NATO PAGDAWAT ANG MGA PASIDUNGOG SA MGA TAWO? Ang mga tawo nagtan-aw kang Juan nga usa ka talagsaong propeta ug nagtuo sila nga siya mao ang Mesiyas. Mahimo ni Juan nga dawaton kining maong pagdayeg ug pahimuslan ang sayop nga pagtoo sa mga tawo. Apan wala kini niya buhata. Hinoon, gisultihan niya ang mga tawo sa iyang tinuod nga papel nga mao ang pag-andam sa dalan nga agi-an sa Ginoo. Talagsaon kining kinaiya nga gipakita ni Juan tungod kay daghang tawo gusto man nga daygon ug yukboan. Ang panig-ingnan ni Juan magdasig kanato sa pagpabiling matinud-anon ug mapaubsanon bisan kon kita mapuno na sa pagdayeg sa katawhan. Si San Pablo nagtambag: “Don’t be selfish; don’t try to impress others. Be humble, thinking of others as better than yourself” (Phil 2:3).