THURSDAY OF THE 7TH WEEK OF EASTER

JUAN 17:20-26. SA UNSA MANG PAAGIHA KITA MAGKAHIUSA? Adunay mga tawo nga magkahiusa diha sa bisyo, sama sa pag-inum, pagpanugal, ug pangbabae. Ang uban magkahiusa sa pagpanglibak, pagpanikas, ug pagpamaligya og druga. Dili kini maayo. Diha sa ebanghelyo si Hesus nag-ampo nga kita magkahiusa sama nga siya ug ang iyang Amahan nahiusa sa gugma. Ang gugma maoy maghimo sa pagkahiusa nga positibong hiyas. Nindot kaayo kon kita magkahiusa sa pagbantay sa kalinaw, sa pagsulbad sa kapobrehon, sa pagpalig-on sa pamilya, sa pag-amping sa kinaiyahan, ug uban pa. Kini nga panaghiusa maoy atong himoon tungod kay pinaagi niini ang katilingban sa Dios malig-on. Hinumduman nato ang giingon ni Hans Urs Von Balthasar: “Even if a unity of faith is not possible, a unity of love is.”

WEDNESDAY OF THE 7TH WEEK OF EASTER

JUAN 17:11B-19. UNSA MAY UNOD SA ATONG MGA PAG-AMPO? Diha sa pag-ampo daghan kanato mangayo sa Ginoo sa personal nga mga kagustohan. Dili man kini sayop, apan magbantay kita tungod kay bisan sa pag-ampo kita mahimong laog ug magkinaugalingon. Si Kristo naghatag kanato’g maayong panig-ingnan sa pag-ampo. Nangaliyupo siya ngadto sa Dios Amahan dili para sa iyang kaugalingong panginahanglan kondili para sa kaayohan sa iyang mga tinun-an. Gihangyo niya ang Amahan nga ubanan kanunay ang mga tinun-an, ug bantayan sila batok sa tanang kadaot dinhi sa kalibotan. Kini magdasig kanato sa pag-ampo dili lamang para sa kaayohan sa kaugalingon kondili para usab sa mga silingan. Adunay nag-ingon: “When you take the time to pray for others, God finds the time to bless you.”

TUESDAY OF THE 7TH WEEK OF EASTER

JUAN 17:1-11. UNSA MAN ANG KINABUHING DAYON? Ang kinabuhing dayon wala lamang magpasabot og kinabuhing walay katapusan. Ang natad sa syensa ug medisina nagsigig pangitag mga paagi sa pagpalungtad sa kinabuhi sa tawo, apan kini dili garantiya sa usa ka maayong kinabuhi para kanato. Para asa man ang kinabuhi nga taas kon kini dili malipayon o makahuloganon? Para sa Balaang Kasulatan, ang kinabuhing dayon dili lamang katas-on sa kinabuhi (quantitative) kondili kalidad sa kinabuhi (qualitative). “Kini ang kinabuhing dayon, nga sila makaila Kanimo, ang bugtong matuod nga Dios, ug ang Imong gipadala, si Hesukristo.”  Nga sa ato pa, ang kinabuhing dayon mao ang usa ka kinabuhi nga nahilambigit pag-ayo sa Buhing Dios, ug tungod niini, puno sa kalinaw, kalipay ug gugma nga walay sama.