Christ the King (Year B)

Daniel 7:13-14; Pagpadayag 1:5-8; Juan 18:33-37

Sa usa ka marriage encounter seminar, gusto nga sutaon sa pari kon kinsang tingog ang matuman diha sa pamilya sa mga partisipante. Iya silang giingnan, “Kadtong mga bana nga maoy hari sa panimalay, palihog ari mo lingkod sa tuong dapit. Kadtong mga 'ander ni misis', palihog lingkod sa walang dapit.”

Pwerteng kurata sa pari kay halos tanang mga bana didto man nanglingkod sa walang dapit ug usa lang gyod ka buok ang milingkod sa tuong lugar. Nagpasabot ba kini nga usa lang sa gatosan ka bana ang tinuod nga hari sa panimalay?

Ug gipangutana sa pari ang nag-inusara nga bana, “Unsa may imong sekreto brod nga naghari man gyod ka sa imong pamilya?”

“Hari?” daw nahibulong ang lalaki. “Ambot lang padre. Basta nia ko dinhi naglingkod sa walang dapit kay mao ni ang mando sa akong asawa.”

Kon makadungog ta sa pulong nga hari, ato dayong mahunahuna ang usa ka tawo nga isog o gamhanan. Ang hari mao ang tawo nga maoy mopatigbabaw o modaog. Kinsa man ang hari sa boxing? Si Manny Pacquiao. Kinsa man ang hari sa pop music? Si Michael Jackson. Kinsa man ang hari sa negosyo sa Pilipinas? Si Henry Sy. Kinsa man ang hari sa kalsada? Ang mga driver sa jeepney nga kusog magpadagan.

Apan, sa atong pagpasidungog ni Cristo nga Hari, wala kita maghunahuna og Dios nga maisog o gamhanan. Wala usab kita maghunahuna og Dios nga maoy magpatigbabaw o magbuot sa tanan. Wala usab kita maghunahuna og Dios nga magpaserbisyo sa mga tawo. Lahi siya nga pagkahari tungod kay siya ang mag-alagad sa iyang katawhan. Gusto niya nga ipatigbabaw dili ang iyang kaugalingon kondili ang kamatuoran, hustisya ug kaangayan. Tungod niini, mahimo niyang kalimtan ang iyang kaugalingon para sa kaayohan sa uban.

Sa pagpangutana ni Pilato kang Jesus, “Ikaw ba ang hari sa mga Judiyo?”, siya mitubag, “Ang akong gingharian wala dinhi sa kalibutan.” Sa iyang pag-ingon niini, gipasabot ni Jesus kang Pilato nga ang iyang pagkahari dili kalibutanon. Dili siya sama ni Caesar, ang hari nga gisilbihan ni Pilato nga igo lamang magmando ug magpaserbisyo. Ang pagkahari ni Cristo lahi tungod kay kini inubanan sa dakong gugma, kamaalagaron, paghatag sa kaugalingon ug pagsakripisyo.

Sa Daang Kasabotan, ang tawhanong hari maoy giisip sa mga Judiyo nga representante sa Ginoo. Mag-alagad siya sa Dios ug mag-atiman sa Iyang katawhan. Ang usa ka hari maningkamot sa pagsabot sa kabubut-on sa Dios ug magpatuman niini sa katawhan. Ipaniguro niya nga ang katawhan mabuhi nga malipayon ug malinawon, layo sa katalagman ug kasakitan. Pinaagi kaniya, mabati sa mga tawo nga sila gipangga ug gipanalipdan sa Ginoo.

Atong makita diha sa Balaang Kasulatan nga kon ang usa ka hari mahimong daotan o mag-abuso sa iyang gahum, ang katawhan mosangpit dayon sa Ginoo ug mangandoy nga Siya na lang ang mahimo nilang Hari. Diha sa unang pagbasa, si propeta Daniel nanagna sa pag-abot sa usa ka tinuod nga Hari, nga munaog gikan sa langit aron maghari sa tibuok kalibutan hangtod sa kahangturan. Kining maong panagna nahatagan og katumanan diha ni Jesus. Siya mao ang gipadala sa Ginoo aron maghari pinaagi sa pag-alima sa Iyang katawhan. Matud pa ni San Pablo sa ikaduhang pagbasa, “Si Jesus mao ang hari sa tanang hari, nga nahigugma ug nagluwas kanato gikan sa sala pinaagi sa pag-ula sa iyang dugo.”

Bililhon kaayo alang kanatong mga Pilipino kining atong pagsabot sa pagkahari ni Cristo. Nagsugod na kita karon sa pagtimbangtimbang kon kinsa ang atong pilion nga mga pangulo diha sa senado, kongreso, probinsya, dakbayan ug mga lalawigan. Ang Simbahang Katoliko maggiya kanato sa pagpili og maayong mga pangulo, apan dili kini magbuot kon kinsa ang pilion. Hinaot lamang unta nga makamao kitang magpili og mga tawo nga maghari kanato pinaagi sa matinud-anong pag-alagad. Dili unta kita makapili og mga tawo nga walay kahadlok sa Dios, mga kurakot, mga kawatan, mga walay pagtahod sa kinabuhi, ug mga mapahimuslanon. Dili unta nato ibaligya ang atong boto, ang atong katungod, ug ang kaugmaon sa atong mga anak.

Mag-ampo kita ngadto sa Cristo nga Hari aron lamdagan ug giyahan niya kita sa kanunay.

Pamalandong nato kini:

1.    Kinsa man ang naghari diha sa atong kaugalingon, sa atong pamilya ug sa atong katilingban?

2.    Unsa man ang mga maayong kalidad sa pagkahari ni Cristo nga angay natong sundon diha sa atong pagdumala sa kaugalingon, sa pamilya, ug sa dakong katilingban?

Saturday of the 33rd Week in Ordinary Time (Year B)

Lukas 20:27-40. Motoo ba kitag pagkabanhaw? Ang mga Saduseo nangutana kang Jesus og kang kinsang asawa ang usa ka babaye nga naminyo sa pito ka higayon inig abot sa panahon sa pagkabanhaw. Gipangutana nila kini dili tungod kay gusto silang mahibalo sa kamatuoran kondili tungod kay gusto nilang kataw-an ang pagtoo nga adunay kinabuhi human sa kamatayon. Imbis masuko, gigamit ni Cristo kini nga kahigayonan sa pagsangyaw sa pagkabanhaw nga nagpaabut sa mga matoohon. Ang Ginoo dili Dios sa mga patay kondili sa mga buhi. Ang tanan nga anaa Kaniya magpabiling buhi. Kining ebanghelyo magdasig kanato sa pagsunod sa kinabuhi ni Cristo aron human sa kamatayon atong madawat ang ganti sa kinabuhing dayon. 

Friday of the 33rd Week in Ordinary Time (Year B)

Lukas 19:45-48. Unsa may atong katungdanan sa templo sa Ginoo? Diha sa ebanghelyo gipamugaw ni Jesus ang mga kasabwat sa kadagkoan sa templo nga nagpaginansya og dagko diha sa ilang pagpamaligyag mga mananap ug sa pagpamaylog mga sensilyo nga ihalaray. Kasagaran, ang mga kabos maoy maapektohan og ayo ning maong buhat. Sa pagsaway ning maong paagi sa pagpahimulos, gigamit ni Jesus ang mga pulong sa propeta: “Ang akong balay, balay sa pag-ampo, apan inyong gihimo nga tagboanan sa mga kawatan”. Kining ebanghelyo magtudlo kanato sa dili paghimo og daotan sa mga balay alampoanan tungod kay kini templo man sa Dios. Dili usab kita manamastamas sa matag tawo tungod kay kini templo man sa Espiritu Santo.

Thursday of the 33rd Week in Ordinary Time (Year B)

Lukas 19:41-44. Unsa man ang maghatag og kasubo sa Ginoo? “Nagkaduol na si Jesus sa Jerusalem ug sa iyang pagkakita niini, mihilak siya, ug miingon, 'Kon nasayod ka pa unta kon unsa ang gikinahanglan alang sa kalinaw!'”. Gihilakan ni Jesus ang katawhan sa Jerusalem tungod kay midumili sila sa pagdawat sa Mesiyas; wala nila makita ang presensya sa Dios diha Kaniya, nga mao unta ang magdala og kalinaw sa ilang kinabuhi. Tungod sa pagdumili sa grasya sa Dios, ang siyudad sa Jerusalem nabungkag sa tuig 70 AD ubos sa gahom sa mga Romanhon. Ang nahitabo sa Jerusalem mahimo unta nga leksyon para kanato. Dawaton gyod nato si Cristo diha sa atong kaugalingon, diha sa pamilya ug diha sa katilingban aron atong makab-ot ang tinuod nga kalinaw ug kalamboan.

Wednesday of the 33rd Week in Ordinary Time (Year B)

Lukas 19:11-28. Giunsa man nato paggamit ang atong mga talento? Ang sambingay naghisgot sa usa ka hari nga masaligon sa iyang mga sakop. Sa iyang paglakaw, gibinlan niya sila og salapi nga ilang gamiton sa bisan unsang paagi nga ilang mahunahunaan. Pinaagi niini masukod ang ilang kamatinud-anon ug kamaalagaron sa hari. Ingon usab niini ang gibuhat sa Dios kanato. Gisaligan kita Niya sa daghang mga butang sama sa kinabuhi, kabtangan, kahibalo ug talento. Gihatag kanato ang kagawasan sa paggamit ning mga gasa sa paagi nga atong magustohan. Gawasnon kita nga mag-amping o mag-abuso niini. Gawasnon usab kita nga mogamit niini para sa linaog nga katuyoan o para sa kaayohan sa uban. Dinhi unya masukod ang atong gugma ug kamaalagaron sa Ginoo.