CHRISTMAS

LUKAS 2:1-14. UNSA MAY KAHULOGAN SA PASKO? Ang tawo walay katakos nga makakaplag sa Dios. Ug ang Dios nasayod niini. Busa, Siya mismo ang nangita sa tawo. Diha sa Pasko, ang Dios nakakaplag kanato; dili na kita kinahanglan nga mangita pa Kaniya. Ang Dios nakakaplag kanato sa lugar nga gitawag og pasongan, o sa Ingles, “manger”. Nagagikan kini sa pinulongang Latin, Manducare, nga nagpasabot “Kaon”. Ang pasongan mao ang lugar diin ang mga mananap mokaon aron mabuhi ug mabaskog. Makatandog hunahunaon nga ang misteryo sa pagpakatawo sa Dios gipadayag sa usa ka lugar nga maghatag og pagkaon ug kinabuhi. Kini ang mas lawom nga kahulogan sa Pasko – si Kristo wala lamang makakaplag kanato, Siya nahimo natong pagkaon, nagtagbaw sa tanan natong kagutom ug kauhaw, ilabina sa atong dakong panginahanglan og Dios.

DECEMBER 24

LUKAS 1:67-79. NAGMATINUD-ANON BA KITA SA ATONG KASABOTAN UBAN SA DIOS? Ang mga tawo sa Israel gitawag og “Katawhan sa Kasabotan” tungod kay ang ilang kinabuhi nagtuyok man diha sa kasabotan nga ilang gihimo uban sa Dios. Ang mga Israelita nanumpa nga mosunod sa mga kasugoan sa Dios, samtang si Yahweh nanumpa nga mailang Dios hangtud sa kahangturan. Sa daghang higayon, ang mga Israelita nagmabudhi-on, apan si Yahweh nagpabiling matinud-anon sa tanan niyang gisaad, ilabi na ang pagpadala og Manluluwas. Ang pagkamatinud-anon sa Dios maoy gisangyaw ni Zacarias diha sa iyang Awit sa Pagdayeg. Ug kini maghagit kanato sa pagmatinud-anon sa atong pagka-Kristiyano sama nga ang Dios nagmatinud-anon kanato. Si Mother Teresa nagpahinumdum: “God has called us not to be successful but to be faithful.”

DECEMBER 23

LUKAS 1:57-66. UNSA MAY MENSAHE SA PAGKATAWO NI JUAN? Ang ebanghelyo nagsaysay sa pagpanganak ni Isabel, ang asawa ni Zacarias. Ginganlan nila ang bata og “Juan”, nga nagpasabot og “Ang Ginoo nagpakita’g dakong kaayo”. Si Juan maoy gasa sa Dios para sa iyang mga ginikanan; gasa usab siya para sa katawhan tungod kay siya mag-andam kanila sa pag-abot sa Mesiyas. Kini magpahinumdum kanato sa kabililhon sa matag binuhat nga mahimugso ning kalibotan. Dako kita’g bili tungod kay ang Dios maoy tag-iya kanato ug walay lain nga nahimugso o mahimugso pa nga sama kanato. Sama kang Juan, gipakatawo kita sa Dios alang sa usa ka katuyoan – ang pagpaila ni Kristo, nga mao ang gugma sa Dios para sa katawhan. Adunay nag-ingon: “There are two great days in a person’s life - the day we are born and the day we discover why.”

DECEMBER 22

LUKAS 1:46-56. KINSA MAY LABANAN SA DIOS UG KINSA MAY DILI? Sa iyang Awit sa Pagdayeg, gisangyaw ni Maria nga ang Dios “nagpakitag kalooy sa tanan nga may kahadlok kaniya”, “gituboy niya ang mga timawa”, ug “gibusog niya ang mga gigutom”. Apan, ang Dios “nagpatibulaag sa mga tawo nga mapahitas-on”, “gipukan niya ang mga hari nga gamhanan”, ug “gipapahawa nga walay dala ang mga dato”. Kining Awit ni Maria usa ka maayong balita para sa mga kabos ug timawa. Ang Dios mobati sa ilang kahimtang ug molihok alang sa ilang kaluwasan. Apan, ang maong Awit usa ka makusganong pahimangno alang sa mga dato ug gamhanan. Kon sila magmapahitas-on ug dili malooy, ang Dios molaglag kanila ngadto sa kaparotan. Klaro ang nahisulat sa Libro ni Santiago 4:6, “God resists the proud but gives grace to the humble.”

DECEMBER 21

LUKAS 1:39-45. UNSA MAY BILILHONG GASA NGA ATONG MAHATAG SA ISIGKATAWO NING PASKO? Human masayod nga mahimo siyang inahan sa Manunubos, ang unang gibuhat ni Maria mao ang pagbisita sa iyang paryenti nga si Isabel. Labing siguro, gusto niyang motabang kang Isabel nga mabdos usab niadtong higayona sa iyang katigulangon. Labaw sa tanan, buot ni Maria nga ipaambit kang Isabel ang kalipay nga iyang gibati tungod sa batang Hesus nga diha sa iyang sabakan. Kining ebanghelyo magtudlo kanato nga ang kalipay, dili ang mahalong butang, maoy pinakanindot nga pinaskohan nga atong mahatag sa isigkatawo. Ang pagbisita, pagtabang, ug pagdala sa gugma ni Kristo maoy gasa nga dili kabayra’g kwarta. Tinuod ang giingon, “The best gifts come from the heart, not from the store.”