SOLEMNITY OF SAINT JOHN THE BAPTIST

LUKAS 1:57-66, 80. UNSA MAY PAGTULON-AN NGA ATONG MAKAT-ONAN GIKAN SA PAGKATAWO NI SAN JUAN MAGBUBUNYAG? Tungod sa iyang madasigong pagwali ug pagpamunyag, daghan ang nagtoo nga si Juan mao na ang gipaabot nga Mesiyas? Mahimo ni Juan nga pahimuslan ang sayop nga pagtoo sa mga tawo para sa iyang personal nga interes. Apan, wala niya kini buhata. Hinoon, miingon siya, “Dili ako ang inyong gipaabot. Adunay mosunod kanako, ug dili ako takos bisan gani sa paghubo sa iyang sandalyas.” Si Juan maoy tawo nga dili mapahimuslanon. Niila siya nga adunay Dios, nga maoy tag-iya sa tanan ug maoy angay'ng pasidunggan. Nasabtan niya ang giingon ni Marcus Tullios Cicero, usa ka bantogang pilosopo: “Next to God we are nothing. To God we are everything.”

SOLEMNITY OF THE MOST SACRED HEART OF JESUS

MATEO 11:25-30. UNSA MAY HULAGWAY SA KASINGKASING SA DIOS? Ang Salmo 103 nag-ingon: “Maluluy-on ug mahigugmaon ang Ginoo, dugay’ng masuko ug hupong sa kaayo.” Kining maong hulagway sa kasingkasing sa Dios nahatagan og katumanan diha ni Kristo. Sa iyang pagpuyo sa kalibotan, gipakita ni Kristo ang gugma ug kalooy sa Dios para sa Iyang katawhan. Ang maong gugma walay kinutoban ug gipamatud-an sa Dios pinaagi sa paghalad sa kinabuhi sa Iyang pinalangga ug bugtong Anak didto sa Krus. Kon ingon niini kadako ang gugma sa Dios kanato, unsa may atong buhaton? Ang Unang Sulat ni San Juan adunay tubag: “Maghigugmaay kita… Kon maghigugmaay kita, magpuyo kanato ang Dios ug mahingpit dinhi kanato ang iyang gugma” (4:7-16). Adunay nagsulat, “Your Lord is a fire of Love. Do not let your hearts be cold.”

THURSDAY OF THE 11TH WEEK IN ORDINARY TIME

MATEO 6:7-15. UNSA MAN ANG SAKTONG PAMAAGI SA PAG-AMPO? Sa pag-ampo, mosangpit kita sa Dios sama sa usa ka anak nga mamarayeg sa iyang amahan. Dayegon ug pasalamatan nato ang Dios sa Iyang makanunayong pag-amping kanato. Dili kita mangayo Kaniya sa bisan unsa na lang. Igo na nga mangayo kita sa inadlaw-adlaw natong gikinahanglan aron mabuhi nga malipayon. Uban niini, pangayoon nato ang grasya nga makapasaylo kita sa isigkatawo ug malikay sa daotang binuhatan. Human sa atong pagdayeg ug pagpangayo, kinahanglan nga mogahin kita’g panahon sa paghilom ug pagpamalandong sa mga Pulong sa Ginoo. Maayo ang pahinumdum ni Frank C. Laubach: “Prayer at its highest is a two-way conversation, and the most important part is listening to God’s replies.”