Posts

SATURDAY OF THE 6TH WEEK OF EASTER

JUAN 16:23B-28. UNSA MAY GIPASABOT SA GIINGON NI HESUS, "BISAN UNSAY INYONG PANGAYOON SA AMAHAN SA AKONG NGALAN IYANG IHATAG KANINYO"? Kini wala magpasabot nga makapangayo kita bisag unsa nga atong gusto basta lamang gamiton nato ang mga pulong “kini among gipangayo sa ngalan ni Hesus, Amen”. Ang pag-ampo “sa ngalan ni Hesus” nagpasabot nga kita mag-ampo sama sa iyang paagi ug kagustohan. Sama kang Hesus, atong himoon ang pag-ampo nga kabahin sa atong kinabuhi. Matag karon ug unya, moduol kita sa Dios sama sa usa ka anak nga mamarayeg sa iyang mapinanggaong Amahan. Si Max Lucado nag-ingon: “Our prayers may be awakward. Our attempts may be feeble. But since the power of prayer is in the One who hears it, our prayers do make a difference.”

FRIDAY OF THE 6TH WEEK OF EASTER

JUAN 16:20-23. KANUS-A MAN MAHIMONG KALIPAY ANG ATONG MGA KASAKIT? Gigamit ni Kristo ang hulagway sa usa ka inahan nga nagbati. Dili lalim ang kasakit nga masinati sa usa ka babaye nga manganak. Apan ang tanan niyang kasakit malimtan ug mapulihan sa dakong kalipay inigkakita niya sa iyang nahimugsong anak. Sa atong pagsunod kang Kristo, makasinati usab kita’g mga sakripisyo – diha sa pagpakigbatok sa daotan, sa pagbarog sa kamatuoran, sa paghigugma sa mga kaaway, ug uban pa. Apan ang tanan natong kasakit mapulihan og kalipay human nato makita ang bunga sa atong maayong buhat. Nindot ang giingon sa usa ka magsusulat: “Every struggle in your life has shaped you into the person you are today. Be thankful for the hard times; they have made you stronger and wiser.”

THURSDAY OF THE 6TH WEEK OF EASTER

JUAN 16:16-20. MAKAHIMO BA ANG DIOS SA PAGBIYA KANATO? Usahay makapangutana kita niini ilabina sa mga panahon nga aduna kitay dagkong suliran. Sa ebanghelyo si Hesus miingon sa iyang mga tinun-an: "Sa dili madugay mawala ako kaninyo, apan sa dili madugay inyo akong makauban. . . Ang inyong kaguol mahimo unya nga inyong kalipay." Nakapalibog kini sa mga tinun-an, apan sa Pentekostes nasabtan nila nga si Hesus dili gayod mobiya kanila. Magpabilin siya sa ilang kinabuhi pinaagi sa Espiritu Santo, nga maoy tigpanalipod, tigpalig-on ug tighatag og kalipay. Busa, sa sunod higayon nga kita adunay dagkong problema ug pag-antos, dili nato angay’ng bati-on nga kita gipasagdan sa Dios. Mosalig kita sa iyang gisaad sa libro sa mga Hebreo: “I will never fail you, I will never abandon you” (13:5).