Solemnidad sa Lawas ug Dugo ni Kristo (B)

Ex 24:3-8; Heb 9:11-15; Mk 14:12-16; 22-26

Niining solemnidad sa Lawas ug Dugo ni Kristo, kita gipahinumduman kon kinsa ang atong gidawat diha sa Eukaristiya ug kon unsa ang atong gibuhat diha sa pagkalawat.

Kinsa man ang atong gidawat diha sa Eukaristiya?

Ang atong gidawat diha sa Santos nga Misa mao si Kristo mismo. Ang ebanghelyo nagsaysay mahitungod sa Katapusang Panihapon kanus-a gitukod ni Kristo ang Eukaristiya. Mikuha siya og pan, nagpasalamat sa Dios, mipikas niini ug miingon sa iyang mga tinun-an: “Dawata ninyo kini. Kini mao ang akong lawas.” Unya, mikuha siya sa kalis, nagpasalamat sa Dios ug mitunol niini ngadto sa mga tinun-an ug miingon: “Kini ang akong dugo, ang dugo sa kasabotan nga iula alang sa daghang katawhan”. Klaro kaayo sa mga lihok ug pulong ni Kristo nga ang Eukaristiya nga iyang gihimo maoy usa ka buhat sa dakong pagsakripisyo. Gawasnon niya nga gihalad ang iyang tibuok kinabuhi alang sa kaluwasan sa mga tawo.

Sa Balaang Kasulatan, ang kasabotan (covenant) maoy usa ka solemne nga pagpanumpa sa duha ka partido nga magmatinud-anon sa ilang gikauyonan. Pananglitan, sa kasabotan tali sa Dios ug sa katawhan sa Israel, ang Ginoo nanumpa nga mag-amuma ug manalipud sa katawhan sa Israel. Sa ilang bahin, ang katawhan sa Israel nanaad nga tumanon nila ang tanang sugo sa Ginoo. Matag solemneng kasabotan adunay ilhanan. Ang bangaw maoy nahimong ilhanan sa kasabotan sa Dios ug ni Noe; ang pagtuli maoy timailhan sa kasabotan sa Dios ug ni Abraham; ug, sumala sa unang pagbasa, ang pagsablig sa dugo gikan sa hinalad nga mga mananap maoy nahimong ilhanan sa kasabotan sa Dios ug ni Moises.

Sa ikaduhang pagbasa, ang sulat alang sa mga Hebreo nagpasabut nga sa bag-ong kasabotan, dili na dugo sa mga mananap ang giula kondili dugo mismo ni Kristo. Ang maong dugo gihatag dili aron isablig kondili aron imnon sa mga tawo alang sa ilang kaluwasan. Si Kristo mao ang naghimo sa paghalad, ug ang gihalad mao ang iyang kinabuhi. Kon ang dugo sa mga mananap gitoohan sa mga tawo nga makahugas sa ilang tawhanong kahugaw, unsa na lang kaha ang kalimpiyo sa tawo nga mahugasan sa dugo sa Anak sa Dios. Diha ni Kristo, wala nay bili ang paghalad ug pagpadugo sa mga mananap. Atubangan sa Dios, wala nay laing mas bililhon pa nga halad kaysa Santos nga Misa.

“Buhata kini aron sa paghandum kanako.” Tungod sa gibiling sugo ni Kristo, ang Eukaristiya nahimong walay kinutubang handumanan sa sakripisyo sa kinabuhi nga iyang gihalad. Dili kini ordinaryong handumanan tungod kay sa matag higayon nga kini saulogon maghatag kini og grasya ug kaluwasan sa mga tawo nga magsaulog niini ug sa mga tawo nga gipahinungdan niini.

Unsa man ang atong gibuhat diha sa pagkalawat?

Diha sa atong pagkalawat, kita gawasnon nga misulod sa usa ka kasabutan uban sa Dios. Diha sa atong pagdawat sa lawas ug dugo ni Kristo, sama ra nga kita miingon: “Oo Ginoo, gusto ako nga mahiusa kanimo.” Sa iyang kabahin, si Kristo nagsaad kanato: “Ang mukaon sa akong lawas ug moinum sa akong dugo makabaton sa kinabuhing walay katapusan.”

Sa English, ang pagkalawat gitawag nato og communion, usa ka nindot nga pulong nga nagpasabut og kahiusahan. Diha sa atong pagkalawat, kita nahiusa uban kang Kristo ug sa Kristohanong katilingban. Kining kahiusahan dili lang sa bangkite o sa pagkaon kondili kahiusahan sa kinabuhi ug misyon ni Kristo dinhi sa kalibutan. Kon kita makig-uban ni Kristo sa matag adlaw sa atong kinabuhi, makasiguro kita nga makadawat sa walay katapusan nga kinabuhi ug kalipay nga iyang gisaad.

Si Archbishop Dominic Tang nabilanggo sa Tsina sulod sa 22 ka tuig tungod lang sa iyang pagtoo ug pag-unong ni Kristo. Human sa unang 5 ka tuig sa solitary confinement, gihatagan siya sa mga gwardya sa bilanggoan og kahigayonan nga makagawas sa pipila lang ka oras ug sa pagbuhat bisan unsay iyang gusto buhaton.

“Unsa man kahay iyang pangayoon?” Mag hot shower? Magdula? Mukaon og lami nga pagkaon? Maglakaw-lakaw ug mosimhot sa lab-as nga hangin? Manawag og long distance sa iyang mga igsoon ug kahigalaan? Apan, dili kini ang gipangayo ni Archbishop Tang. Hinoon, mihangyo siya pinaagi sa pag-ingon: “Kon mahimo tugoti ko ninyo nga magsaulog sa Santos nga Misa?”