Juan 18:1-19:42
Ang krus nagpasabut og pag-antos ug pagsakripisyo. Adunay
krus nga magagikan sa kinaiyahan sama sa katigulangon, sakit ug “natural
calamities”. Aduna usay krus diha sa
atong pagtuman sa mga katungdanan (pagka-padre kura, pagka-mayor,
pagka-ginikanan, ug uban pa). Pipila sa atong krus mao ang atong isigkatawo
(anak, silingan, higala, ug kaaway). Ug naa puy krus nga bunga sa atong
pagpakasala ug daotang binuhatan.
Karong hapona, atong simbahon ang Balaang Krus ni Kristo. Unsa
man ang Krus sa Ginoo? Ang Krus nga gipas-an ni Kristo mao ang atong mga
kahuyang ug sala. Gipas-an niya kining Krus ngadto sa kalbaryo aron nga kita
mamaayo ug mahimong matarong atubangan sa Ginoo (1 Pedro 2:24). Gipanagna na
kining daan ni propeta Isaias: “Atua ang kasakit nga Iyang pagasination; atua
ang kagul-anan nga Iyang pagapas-anon... Sa Iya ihatag ang silot nga maoy
maghatag og kalinaw. Sa Iyang mga samad kita makadawat og kaayohan.”
Ang Krus ni Kristo mao ang matang sa krus nga makaluwas ug
makasantos. Gipas-an niya kini gumikan sa Iyang dakong gugma sa mga tawo. Wala
nay gugma nga makalabaw pa sa gugma sa usa nga mohatag sa iyang kinabuhi alang
sa isigka-ingon. Ug kini mao ang gibuhat ni Kristo para kanato diha sa krus.
Tungod kang Kristo, ang krus nahimong larawan sa mahigugmaong Dios.
Niniing Biernes Santo, mangutana kita sa atong kaugalingon:
Unsa o kinsa man ang krus nga atong gipas-an karon. Managlahi ang matang ug
gidak-on sa krus sa matag tawo. Pero, kitang tanan aduna gayoy krus nga
gipas-an. Kini nga kamatuoran maghatag kanato og consolation, Wala kita
mag-inusara sa pagpas-an sa krus. Kaganina, samtang nag-estasyon kita sa krus
padulong sa Ilihan Shrine, gibati nako ang dakong consolation nga nakita ang
daghang tawo nga mikuyog. Bata ug tigulang. Nabati nako nga wala ako
mag-inusara sa pagsunod ni Kristo. Ingon usab niini ang atong bati-on kon
makita nato nga wala kita mag-inusara sa atong mga problema. Ug daghang mga
tawo mas dako pa kaayo og problema sa ato. Kon mabug-atan kita sa atong krus,
tan-awon lamang nato ang krus sa uban, ilabi na ang gipas-ang krus sa mga
“terminal patients” ug sa mga biktima sa katalagman. Labing siguro, atong
maamgohan nga ang krus sa ubang mga tawo mas bug-at pa kaysa atoa.
Ngano nga angay man natong pas-anon ang atong krus? Ang
pagpas-an sa krus bililhong kabahin sa pagsunod ni Kristo. Ang Ginoo mismo ang
miingon: “Ang buot musunod kanako kinahanglan makamao nga malimot sa
kaugalingon, mopas-an sa iyang krus, ug mosunod kanako.” Pinaagi sa pagpas-an
sa krus, atong masunod si Kristo nga mihalad sa Iyang kinabuhi para sa
kapasayloan sa mga sala. Kon atong pas-anon ang atong krus para sa kinabuhi ug
kaayohan sa uban, makahatag usab kini og kaluwasan sa atong kaugalingon. Diha
sa atong pagpas-an sa krus, ihalad nato ang atong pag-antos para sa atong mga
sala ug sa mga sala sa atong mga minahal sa kinabuhi.
Unsaon man nato pagpas-an ang atong krus? Dili makatabang
nga magpas-an kita sa krus uban sa pagmahay, pagbagolbol ug kasuko. Pas-anon
nato ang krus uban sa pagpailob ug sa dakong gugma. Magkuha kita og inspirasyon
sa usa ka ginikanan nga mahigugmaong mag-alima sa iyang masakitong anak o sa
usa ka amahan nga puno sa kadasig nga magtikad sa uma aron adunay ipakaon sa
pamilya.
Dugang pa niini, pas-anon nato ang krus uban sa pagsalig nga
aduna kitay Amahan sa Langit nga nag-uban kanato sa kanunay. Kaganina samtang
nag-estasyon kita padulong sa bukid, nakita nako ang usa ka gamay'ng bata nga
gihawiran sa iyahang inahan ug amahan. Kining bata wala gyud maluya sa
pagbaklay ug wala gyud mobati og kabalaka tungod kay nagsalig man siya sa iyang
mga mahigugmanong ginikanan nga naghawid sa iyahang mga kamot. Ingon usab unta
niana ang atong bation samtang nagpas-an kita sa atong mga krus sa kinabuhi.
Wagtangon nato ang atong mga kahadlok ug kabalaka. Mosalig kita nga adunay Dios
nga maghawid kanato. Naa pa gyud tay Inahan sa Langit, ang Mahal nga Birhen nga
mosapnay pud nato sa atong kalisud.
Sa katapusan, sa atong pagpas-an sa krus, ipunting nato ang
atong mga mata sa kinabuhing dayon nga nagpaabot kanato sa unahan. Kaganina,
samtang naghimo kita sa estasyon sa krus, wala ako mobatig kakapoy tungod kay
nasayod ako nga adunay tumoy ug katapusan ang estasyon – ang habog ug maanindot
nga bukid. Sa samang paagi, diha sa atong pagpas-an sa krus, hunahunaon nato
nga adunay katapusan ang tanan. Ug labaw sa tanan, nagpaabot kanato ang
kinabuhi ug kalipay'ng dayon nga gisaad kanato sa Ginoo.
Sama kang Kristo, makat-on unta kita sa pagpas-an sa atong
krus ug magtabang sa uban nga naglisod sa pagdala sa ilang mga krus sa
kinabuhi.
