6TH SUNDAY OF EASTER (YEAR B)

JUAN 15:9-17. UNSA MAN NGA MATANG SA GUGMA ANG ATONG IPAKITA SA ISIGKATAWO? Si Kristo nag-ingon, “Maghigugmaay kamo sama nga nahigugma ako kaninyo.Walay tawo nga adunay gugma nga labaw pa niini, nga mohalad sa iyang kinabuhi alang sa iyang mga higala.” Atong masabtan nga ang gugma nga gisugo kanato mao ang gugma nga andam malimot sa kaugalingon ug mag-antos para sa uban. Kini ang gugma nga gibuhat ni Hesus para kanato ug kini usab ang gugma nga gusto niya nga atong ipakita sa usag-usa. Ang atong pagtuman ning maong sugo sa gugma maoy makapaduol kanato sa Dios ug maghatag kanato’g tinuod nga kalipay. Matod pa ni Kristo, “Gisulti ko kini kaninyo aron ang akong kalipay maanaa kaninyo ug ang inyong kalipay mahingpit.”