Ika-4 nga Domingo sa Ordinaryo nga Panahon (B)

Dt 18:15-20; 1 Cor 7:32-35; Mk 1:21-28

“Natingala ang mga tawo sa iyang paagi pagpanudlo kay may gibug-aton ang iyang mga pulong. Lahi kaayo sa mga magtutudlo sa balaod.”

Unsa man ang nakalahi sa paagi sa pagpanudlo ni Kristo? Unsa man ang naghatag og gibug-aton sa iyang mga pulong?

Labaw sa tanan, ang autoridad ni Kristo anaa sa iyang pagka-Dios. Ang mga magtutudlo sa balaod magpakita sa ilang autoridad pinaagi sa paggamit sa gipanulti ug komentaryo sa mga makinaadmanong tawo. Kasagaran, mosugud sila sa pag-ingon, “Sumala sa gisulti ni . . .” Apan lahi ang autoridad ni Kristo tungod kay kini nagagikan sa iyang pagka-Siya. Siya ang bugtong Anak sa Dios Amahan. Siya ang gipadala aron pagpadayag sa Diosnong gugma para sa mga tawo. Siya mismo ang Buhing Pulong nga maggiya kanato padulong sa kinabuhing dayon. Mao nga sa iyang pagpanudlo, si Kristo dili magpanuko sa pag-ingon, “Sultihan ta kamo, ang mutoo kanako makabaton sa kinabuhing walay katapusan”.

Dugang pa niini, adunay gibug-aton ang mga gitudlo ni Kristo tungod kay kini kanunay man nga paga-ubanan sa buhat. Pananglitan, ang ebanghelyo karon nagsaysay nga human sa iyang pagpanudlo, si Kristo nag-ayo sa tawo nga giyawaan. Ang mga pulong ug buhat ni Kristo dili magkabulag. Wala lamang niya isangyaw ang Gingharian sa Dios; Iya usab nga gitabangan ang mga tawo nga makasinati sa paghari sa Ginoo pinaagi sa pagpasaylo sa ilang mga sala, pag-ayo sa ilang mga sakit, ug sa pagtabang sa ilang kalisud ug kakabos. Samtang ang mga magtutudlo sa balaod gisaway tungod kay maayo lang sila magtudlo sa mga buluhaton, apan dili sila makamao mutabang sa pagpagaan sa problema sa mga kabos.

Unsa man ang hagit ning ebanghelyo kanato karon?

Pinaagi sa bunyag, gipaambit ni Kristo kanato ang iyang pagkapropeta. Bisan dili takus, gihatagan kita og autoridad sa pagdala ug pagtudlo sa mga Pulong sa Dios ngadto sa usag-usa. Dili lang ang mga pari ug relihiyoso, kondili kitang tanan kinahanglan nga magtudlo sa kabubut-on sa Dios ngadto sa atong mga anak, kauban sa trabaho, kaklase, ug kasilinganan.

Ug sama kang Kristo, mahuptan nato ang kredibilidad sa pagtudlo kon atong ubanan ang atong mga pulong sa maayong mga buhat. Gamiton nato ang atong autoridad o gahum sa matinud-anon ug mapaubsanong paagi. Magpinasayloay kita ug magtinabangay sa kalisud aron nga ang atong mga anak o isigktawo motoo sa mga butang nga atong gipanudlo.

Usa ka tinahud nga buddhist monk ang gipangutana unsa man para kaniya ang labing nindot nga aspeto sa Kristiyanismo. Ug siya mitubag sa pag-ingon: “Makita kini diha sa gihimo nga paghugas ni Kristo sa mga tiil sa iyang mga tinun-an. Sukad masukad wala pa akoy nadunggan nga Ginoo nga moluhod atubangan sa iyang binuhat aron paghugas sa iyang mga tiil. Makatandog ug dili malabwan kitang maong klase sa gugma.”

(Ang maong estorya gisaysay ni John Fuellenbach, SVD)