Gen 9:8-15; 1 Pet 3:18-22; Mk 1:12-15
Si Tibo miingon sa iyang mga anak: "Sulod niining kwaresma, dili na kita mokaon og karne sa matag Biernes. Mao kini ang gisulti ni Father sa misa."
Apan usa ka Biernes niana, nakita sa kamanghurang anak nga nag-abli og delata nga beefloaf ang ilang tatay. Iya kining gibadlong: "Tay, ingon ka dili na ta mokaon og karne sa Biernes, nganong nag-abli man ka og beefloaf?"
"Dili man kini karne", dayong tubag ni Tibo.
"Unsay dili? Tay, gitawag na og beefloaf kay duna na siyay karne nga baka", mipasabut ang mga bata.
Unya nangisog si Tibo sa pag-ingon: "Oi, oi, ayaw ko ninyo ilara mga anak. Kay ngano, nagtoo ba mo nga kanang hotdog adunay sulod nga iro?"
Niadtong milabay nga Mierkoles nagsugod ang panahon sa kwaresma. Gihimo nato ang pagpamadlis og abo sa agtang agi og pagpakita sa pagdawat nato sa atong pagkatawhanon ug sa atong determinasyon nga maghinulsol sa atong mga kasal-anan. Nasayud kita nga kita tawo lamang, huyang ug dali madani sa kadaotan. Apan, nagpabilin kita nga masaligon nga inubanan sa panabang sa Dios, mabuntog nato ang gahum sa yawa ug mabiyaan ang sala.
Ang labing dakong tumong sa kwaresma mao ang paghimo og spiritwal nga pagpangandam alang sa kasaulogan sa paghalad ni Kristo sa iyang kinabuhi ug sa iyang madaugong pagkabanhaw. Ang mga pagbasa niadtong Mierkoles Badlis nagpahinumdum kanato sa mga naandan nga gimbuhaton sa panahon sa kwaresma: matinud-anong pag-ampo, pagpuasa o pagsakripisyo, ug pagtabang sa mga kabos. Kining tulo maoy giisip nga labing lig-on nga pangkontra sa tentasyon sa yawa.
Motoo ba kamo nga adunay yawa? Ang pulong nga “Satanas” (satan'el in Hebrew) o “Diyablo” (diabolos in Greek) nagpasabut og kaaway. Si Satanas mao ang kaaway nga magdala sa tawo ngadto sa kaalaotan. Ang ebanghelyo nagsaysay kanato nga si Kristo gitental ni Satanas didto sa kamingawan sulod sa kwarenta ka adlaw. Apan nagpabilin siya nga malig-on tungod kay ang mga anghel sa Dios nagtabang kaniya.
Bisan tuod dili nato makita si Satanas, atong mabati nga siya nagalihok gayud aron kita mapalayo sa Ginoo. Sugod sa sayong kabuntagon hangtud sa lawom nga kagabhion, kapila man nato masinati ang lihok ug tentasyon sa yawa? Nadungog mo ba siya sa dihang siya miingon: “Duol ngadto sa imong mga silingan nga nagtapok kay nindot ang tsismis didto.” “Daota ang imong isigka-trabahante aron madaot ang iyang pangalan ug ikaw nay ipuli sa iyang taas nga posisyon.” “Unaha ang imong kaugalingon kay basin maalkanse ka.” “Pagkodigo aron modako ang imong grado.” “Panikas sa negosyo aron madato ka.” “Pangabit aron ilhon ka nga tinuod nga lalaki.” “Gawas lang og una sa opisina. Dili bitaw ka mahinungan.” “Inum og daghan samtang nia pa ka sa kalibutan. Sa langit wala nay beer.” “Ayaw kahadlok mangawat sa kwarta sa gobyerno kay daghan man mo naghimo ana.” “Palit og mahalon nga butang aron daygon ka sa mga tawo.” “Unya na lang pagtarong sa imong kinabuhi kon matigulang naka. Pasayloon lage ka sa Dios.” Ang mga pulong sa yawa nindot apan makadaot.
“Ayaw lang gyud patental.” Nasayod kita nga sayon lang ni isulti, apan lisud buhaton. Ang yawa makamao mogamit og panagway nga maanyag, lawas nga makadani, ug mga butang nga makasilaw. Ug basi sa atong kasinatian, dili sayon ang pagbalibad sa tentasyon ni Satanas. Apan, ang maayong balita sa ebanghelyo para kanato karon mao kini: Si Kristo nagmadaogon batok sa mga tentasyon sa yawa. Walay nahimo kaniya si Satanas! Tungod niini, kita nahatagan og dakong kadasig ug kaisog. Inubanan ni Kristo, aduna kitay katakos nga magdumili sa tentasyon sa yawa ug magmadaogon batok sa gahum ni Satanas.
Niining panahon sa kwaresma, moduol kita sa sakramento sa kumpisal ug ihalad nato ang atong mga sala ngadto ni Kristo. Uban sa pasaylo sa Ginoo, madawat usab nato ang dugang grasya ug kusog nga mao unyay atong gamiton sa pagpakigbatok sa yawa.
