Ika-7 nga Domingo sa Ordinaryo nga Panahon (B)

Is 43:18-19, 21-22, 24b-25; 2 Cor 1:18-22; Mk 2:1-12

Usa ka adlaw niana, si Tibo misulti sa iyang higala nga si Pilo nga aduna siya laing gibati sa iyang lawas. “Asa man imong sakit pre”, pangutana ni Pilo. Ug miingon si Tibo, “Daghan ayo ko gibati nga sakit pre.” Gitudlo niya ang dapit sa iyang ulo, kasingkasing, atay, kidney ug tuhod. “Kon mao kana pre, kinahanglan magpa-doktor gyud ka”, sugyot ni Pilo. Apan si Tibo miingon, “Mao unta lage, apan wala man koy kwarta ibayad sa doktor.” Naluoy si Pilo sa iyang higala ug miingon: “Ayaw kabalaka pre. Ubanan ta ka ug ako ray mubayad sa doktor.”

Tuod man, giubanan ni Pilo si Tibo ngadto sa doktor. Human ma check-up, nasuta sa doktor nga gamay ra kaayo ang problema ni Tibo: Adunay bun-og sa iyang tudlo. Mao diay nga sakit ang tanang dapit sa iyang lawas nga iduot sa iyang tudlo.

Adunay duha ka punto sa mga pagbasa nga makapatandog kanato. Ang una mao ang nindot nga gibuhat sa upat ka tawo alang sa ilang paralitiko nga higala. Naningkamot sila pag-ayo nga maduol ug matambalan ni Hesus ang ilang amigo nga masakiton. Sanglit daghan kaayo ang mga tawo nga nagpalibut ni Kristo, naglisud sila sa pagpaduol sa ilang masakiton ngadto sa nahimutangan ni Hesus sulod sa balay. Apan, adunay nakahunahuna kanila nga ipaagi ang ilang masakiton sa atop sa balay. Nahingangha si Hesus sa ilang pagpaningkamot ug sa ilang dakong pagtoo. Unya, giayo niya ang paralitiko sa iyang lawasnon ug espirituhanon nga balatian.

Pagkanindot unta hunahunaon kon aduna kitay mga higala nga motabang kanato nga maduol sa Dios. Kini sila ang tinuod gyud nga higala, mga tawo nga maglantaw dili lamang sa atong lawasnon nga kalipay kondili sa ato usab nga espirituhanong kaayohan. Angay tingali kitang mangutana sa atong kaugalingon: Unsa man nga klase sa mga higala ang nagpalibot kanato? Nagtabang ba sila nga mahaduol kita sa Dios o sila ba hinuon ang nakaingon nga nahisalaag kita sa laing dalan? Unsa man pud ta nga klase nga higala sa uban? Kita ba ang tawo nga nangaliyupo sa Dios aron matigayon o mamaayo ang kinabuhi sa atong mga higala? Dili ba kaha kita na hinuon ang hinungdan nga nahilayo sa Ginoo ang atong mga higala?

Ang laing punto nga makapatandog kanato mao ang pagkamapasayloon sa Ginoo. Diha sa unang pagbasa, si Yahweh namulong: “Ako ang nagpapas sa imong kasaypanan . . . Ako nang gikalimtan ang imong mga sala.” Atong masabtan nga ang Dios sa kanunay nagbag-o sa kalibutan ug naghatag og kahigayonan sa mga tawo nga magbag-o sa ilang kinabuhi. Si San Pablo, sa ikaduhang pagbasa, nag-ingon nga ang Dios matinud-anon ug makanunayon. Dili siya sama kanato nga mag-usab-usab og hunahuna ug walay baroganan. Ang Ginoo magpabilin nga manggiloloy-on ug mapasayloon. Matag higayon nga kita mobalik kaniya, atong madawat ang Iyang Amahanong pasaylo.

Apan ang pangutana mao kini: Makadawat ba kita nga ang Dios mapasayloon? Diha sa ebanghelyo, ang mga Pariseo dili makadawat nga si Hesus nagpasaylo sa sala sa usa ka tawo. Masabtan nato kini tungod kay ang mga Pariseo wala man modawat nga si Hesus usa ka Ginoo. Para kanila, ang Dios lang ang makapasaylo sa sala. Wala man sila masayod nga si Hesus mismo mao ang presensya sa usa ka mapasayloon nga Dios. Apan kita karon nga miila kang Kristo nga Dios, mitoo ba ta nga Siya mopasaylo sa mga sala sa tawo?

Adunay mga tawo nga maglisud pagtoo nga sila gipasaylo sa Dios. Pananglitan, diha sa sakramento sa kumpisal, ilang ibalikbalik pagkumpisal ang sala nga unta gipasaylo na. Sa unang pagbasa, si Yahweh miingon: “Ayaw handuma ang nangagi, ni maghandum mo sa karaang mga butang.” Nindot kini nga pahimangno tungod kay daghan kanato magpabilin nga binilanggo sa kagahapon. Daghan kanato dili makapasaylo sa kaugalingon tungod sa usa ka sayop o sala nga nahimo sa dugay nang panahon. Hangtod karon, magsigi lang gihapon ta og mahaymahay ug dili na hinuon makakita og bag-ong direksyon sa kinabuhi. Dili man kini mao ang kabubut-on sa Dios. Sa iyang pagpasaylo kanato diha sa sakramento sa kumpisal, kita gidapit sa Ginoo nga kalimtan ang nabuhat nga sala ug magsugod og bag-o nga kinabuhi.

Aduna usay mga tawo nga dili makadawat nga ang Dios mopasaylo sa usa ka dakong makasasala. Mas gusto nila nga kining daotang tawo silotan ug paantoson sa Dios. Mas malipay pa gani sila nga dili na lang pasayloon sa Ginoo kining tawhana aron maimpiyerno. Apan lahi ang kabubut-on sa Ginoo. Buot Niya nga ang tanan nga tinuoray nga magbasol sa sala pasayloon aron mahiuban kaniya sa Iyang gingharian.

Sama nga ang Dios mapasayloon, kitang tanan usab gidapit nga magpinasayloay sa usag-usa. Diha sa atong pag-ampo sa “Amahan Namo”, kita kanunay gipahinumduman nga andam mohatag og pasaylo sa mga tawo nga nakasala batok kanato.