Ika-3 nga Domingo sa Adbyento (C)

Sofonias 3:14-18; Filipos 4:4-7; Lucas 3:10-18

Paglipay sa kanunay! Kini mao ang dakong hagit sa Simbahan kanato niining ika-3 nga Domingo sa Adbyento. Kita giawhag nga magmalipayon tungod kay nagkaduol na ang pag-abot sa Ginoo.

Unsa man ang makapalipay sa tawo? Ang uban kanato malipay sa pagkaon, ilabi na kon adunay litson o kalderetang kanding. Ang uban mobati og kalipay diha sa ilimnon nga makahubog sama sa bugnaw kaayo nga beer. Aduna puy mga tawo nga malipay sa pagdula og sports sama sa tennis o basketball. Samtang ang uban malipay sa kwarta o sa mga butang materyal sama sa nindot nga celfone, laptop computer, ipod, mahalon nga bag ug sapatos. Kining klaseha sa kalipayon pwede natong tawgon og “ordinaryong kalipay”. Dili kini mao ang matang sa kalipay nga giawhag sa atong liturhiya karong Domingoha.

Adunay kalipay nga makab-ot sa tawo pinaagi sa pagbuhat og maayo. Labing siguro, kitang tanan nakabati na niining matang sa kalipay tungod kay sa daghang higayon nakahimo man kita og mga dalaygong buhat sa atong kinabuhi. Pananglitan, mibati kita og kalipay sa dihang gitabangan nato ang atong silingan nga makapatambal sa iyang sakit. Mibati usab kita og kalipay sa dihang nakahatag kita og saktong tambag sa usa ka higala. Nindot usab ang atong gibati sa dihang naluwas nato ang usa ka tawo gikan sa disgrasya. Kining maong kalipayon pwede natong tawgon nga “makahuloganong kalipay”. Ug kining matanga sa pagbati mao ang gusto sa Simbahan nga atong maangkon niining panahon sa Adbyento.

Diha sa ebanghelyo, dihay tulo ka hut-ong sa mga tawo nga miduol kang Juan Magbubunyag ug nangutana, “Unsa may angay namong buhaton?” Giila sa mga tawo si Juan nga usa ka propeta o balaang sulugoon sa Dios ug gusto sila masayod gikan kaniya unsa ang matang sa kinabuhi ang ilang sundon aron makabaton og kaluwasan. “Unsa may among buhaton?” Di ba angay usab kitang mangutana niini karon? Atong sabton ang mga tubag ni Juan tungod kay kini makatabang gayod kanato sa pagkab-ot og makahuloganong kalipay.

Sa daghang mga tawo, si Juan miingon, “Kadtong adunay duha ka sapot angay nga mohatag sa wala, ingon man ang adunay pagkaon.” Usa kini ka tawag sa pagkamanggihatagon. Si Juan nagpahinumdum kanato nga ang isigkatawo atong igsoon, ug diha sa iyang kawad-on, angay lamang nga ato siyang tabangan. Wala kita sugoa nga ihatag nato ang tanan kondili nga atong ipaambit ang unsay sobra kanato. Dili ba gud lain nga samtang nanimaho nang suok ang uban natong biste, adunay atong silingan nga walay sinina?

Sa mga kobrador sa buhis, si Juan miingon, “Ayaw paningil og sobra sa gitakda.” Usa kini ka tawag sa pagkamakiangayon. Ang propeta nagpahinumdum kanato sa paggamit sa atong gahum sa maayong paagi. Dili maayo nga magpadato kita sa kaugalingon pinaagi sa pagpanikas ug pagpamintaha sa uban. Nindot kini nga pahimangno para sa atong mga igsoon nga nagtrabaho diha sa gobyerno o kadtong anaa sa habog nga posisyon sa katilingban. Dili ba ngil-ad kaayo paminawon nga atong pakan-on ang atong mga anak pinaagi sa bahandi nga atong gikawat gikan sa katawhan?

Ug sa mga sundalo, ang propeta miingon, “Ayaw'g panaugdaog ni pamasangil og bakak kang bisan kinsa ug ayaw'g reklamo sa imong sweldo.” Usa kini ka tawag sa pagkamatarong. Si Juan nagpahinumdum kanato sa pagmatinud-anon sa atong trabaho ug pagpanerbisyo. Gisoholan kita sa saktong sweldo ug angay lamang nga magtrabaho kita sa tinuoray. Dili ba lain tan-awon nga gamiton nato ang atong gahum sa pagyatak sa katungod sa uban ug sa pagdaot sa integridad sa mga tawo nga maoy gikuhaan sa atong sweldo?

Sa ikaduhang pagbasa, si San Pablo nagdapit kanato sa paglipay kanunay uban sa Ginoo. Kitang mga Kristiyanos magmalipayon dili sa bahandi ug gahum kondili diha sa pagpakig-uban sa Dios. Mabati nato ang makahuluganong kalipay kon kita magsugod pagpuyo nga manggihatagon, makiangayon ug matarong.