30th Sunday in Ordinary Time (A)

Ex 22:20-26;1 Thes 1:5-10; Mt 22:34-40

Usa ka gabii niana, nangutana kining negosyante sa iyang katabang, “Inday, gikuhaan naba nimo og duha ka kilo ang sako sa bugas?” “Yes, mam” mitubag ang katabang. “Inday, gikuhaan naba nimo og usa ka litro ang lata sa mantika?” nangutana ang negosyante. “Humana mam” tubag sa katabang. “Kon mao kana”, miingon ang negosyante, “saka na diri kay mag rosaryo na kita.”

Klaro kaayo sa storya nga kining negosyante wala makakita sa kalambigitan sa iyang kinabuhi ug sa iyang pag-ampo. Wala siya masayud nga ang iyang pagpanikas sa tindahan makadaot sa iyang relasyon sa Ginoo ug sa iyang pag-ampo. Ang Ebanghelyo karon nagtudlo nga ang tinuod nga gugma sa Dios angay gayud ubanan og gugma sa isigkatawo.

Gipangutana si Hesus “Unsa man ang labing dako nga kasuguan”. Agi og tubag siya miingon: “Higugmaa ang Dios sa tibuok mong kasingkasing, sa tibuok mong kalag ug sa tibuok mong hunahuna. Mao kini ang labing dako ug labing una nga sugo. Ang ikaduha susama ra niini. Higugmaa ang imong isigkatawo sama sa paghigugma nimo sa imong kaugalingon. Niining duha nagabarog ang tanang balaod ni Moises ug sa mga Propeta.”

Atong masabtan diha sa mga pulong ni Hesus nga ang tinuod nga gugma adunay tulo ka bahin nga dili pwede bulagon: una, ang paghigugma sa Dios; ikaduha, ang paghigugma sa isigkatawo; ug ikatulo, ang paghigugma sa kaugalingon. Ang ikatulo wala isugo sa derekta nga paagi, apan kini gihimong basehanan sa ikaduha. Ang usa ka tawo dili makahimo sa paghigugma sa iyang isigkaingon kon dili siya makamao mahigugma sa iyang kaugalingon.

Labaw sa tanan, kita gisugo nga mahigugma sa Dios tungod kay siya man ang tuburan sa tanang kinabuhi, kaayo ug gugma. Apan unsaon man nato pagpadayag sa atong gugma niining Dios nga dili man nato siya makita? Aniay pipila ka sugyot:

Una, higugmaon ta ang Dios pinaagi sa pagdawat ug pagsanong sa iyang gidalit nga kaluwasan. Diha sa Ebanghelyo ni San Juan atong masayran nga tungod sa dakong gugma sa Dios iyang gipadala ang iyang pinalanggang Anak aron nga ang mga tawo nga mutoo kaniya dili mamatay kondili makabaton hinuon sa kinabuhing walay katapusan (3:16). Ang gasa nga gidalit sa Dios dili basta-basta, kondili kinabuhing madagayaon ug walay kinutuban nga gidala sa iyang bugtong Anak. Kon tinuod kita nga mahigugma sa Dios, dili nato balewalaon kining maong gasa. Hinoon, angay nato kining dawaton pinaagi sa pagsunod sa kinabuhi ug panig-ingnan sa iyang Anak nga si Hesu-Kristo. Ang mainitong pagdawat ning maong gasa maoy timailhan sa atong pagtahud ug paghigugma sa naghatag niini.

Ikaduha, higugmaon nato ang Ginoo pinaagi sa atong pagpaambit sa gasa nga iyang gihatag kanato ngadto sa uban. Gipasabut ni Hesus nga ang gugma nato sa Dios walay bili kon kita dili mahigugma sa atong isigkaingon. Diha sa sulat ni San Juan, kita giingnan nga “Ang tawo nga moingon nga nahigugma sa Ginoo apan walay gugma sa iyang igsoon usa ka bakakon”. Busa, angay gayud nga ang kaluwasan nga atong nadawat gikan sa Dios – sama sa pasaylo, gugma, tabang materyal ug espiritwal, ug uban pa – ato usab nga ipaambit ngadto sa atong mga kaigsoonan ug kasilinganan aron makasinati pud sila sa gugma sa Ginoo pinaagi kanato.

Ug ikatulo, ipadayag ta ang atong gugma sa Dios pinaagi sa matinud-anong mga buhat. Ang nindot nga mga pulong walay pulos kondili kini pagaubanan sa lihok. Si Hesus mismo nagpakita sa iyang gugma sa Dios Amahan pinaagi sa pagtuman sa iyang kabubut-on ug paghatag og panahon para makig-uban Kaniya diha sa pag-ampo. Ug gipakita pud niya ang iyang gugma sa isigkatawo pinaagi sa pagtabang sa mga pobre, masakiton, ug dinaugdaug. Busa, kon tinuod kita nga nahigugma sa Dios, sundon ta ang iyang kabubut-on ug hatagan ta siya og panahon; kon tiunay kita nga nahigugma sa isigkatawo, magmaki-angayon kita ug magtabang sa mga kabos ug masulub-on; ug kon tinuod kita nga nahigugma sa atong kaugalingon, ampingan nato ang atong kinabuhi, lawasnon ug espirituhanon.