Ika-33 ka Domingo sa Ordinaryong Panahon (A)

Prv 31:10-13, 19-20, 30:31; 1 Thes 5:1-6; Mt 25:14-15, 19-21

Diha sa Ebanghelyo si Kristo naghatag og usa ka sambingay aron pagtudlo sa mga sumusunod unsay angay nilang buhaton samtang magpaabut sa pagbalik sa Ginoo. Sama sa mga sulugoon sa sambingay, ang matag usa kanato gihatagan sa Dios og mga “talento” para gamiton ug palamboon. Dili igsapayan ang gidaghanon sa atong nadawat nga mga talento. Para sa Ginoo, ang labing importante mao ang atong paggamit sa mga talento para sa kaayohan sa kadaghanan. Kini mao ang pagpangandam nga angay natong himoon para sa pagpakighimamat sa Dios.

Diha sa sambingay, ang Agalon walay gisulti sa mga sulugoon mahitungod sa angay nga buhaton sa mga talento. Ilubong ba kini? Gamiton sa negosyo? Ipalit og yuta? O, gamiton para sa pagtabang sa mga kabos? Tungod niini, ang mga sulugoon nag-iyahay na lamang sa pagdiskarte. Dinhi sa kalibutan, si Kristo naglaum nga ang iyang mga sumusunod magpuyo og matarong nga kinabuhi. Kon sa unsang paagi, kita na ang gitahasan sa pagtugkad niini.

Nalipay ang Agalon sa duha ka sulugoon tungod kay napatubo nila sa duha ka pilo ang mga talento nga gibilin kanila. Apan, nasuko siya pag-ayo sa sulugoon nga walay gihimo sa iyang talento gawas sa paglubong niini. Sa susamang paagi, malipay pag-ayo ang Dios kon atong gamiton ang mga gasa nga iyang gihatag kanato tungod kay pinaagi lamang niini sila atong mapalamambo. Diha sa atong pagpangalagad sa katawhan, kita motubo ug mohamtong sa atong pagkatawo. Labing siguro, ikasuko sa Dios ang dili paggamit sa mga talento tungod kay kini dili makaayo sa atoa ug sa uban.

Daghan kanato gahunahuna nga aron ilhon o daygon kinahanglan magbuhat og dagkong butang. Apan gipahinumduman kita karon nga ang Dios malipay sa mga gagmay ug ordinaryong butang nga atong mahimo. Sa unang pagbasa, pananglitan, gidayeg ang usa ka asawa tungod sa iyang simple, ordinaryo ug inadlaw-adlaw nga mga buhat. Sama siya sa sulugoon sa sambingay nga gidayeg sa Agalon: “Tungod kay masaligan ka sa gagmay nga mga butang, hatagan ko pa ikaw og dagko. Ari ug paglipay uban kanako.”

Kining mga pagbasa angay nga magdasig kanato sa pagtugkad o pag-ila sa mga gasa o talento nga atong nadawat gikan sa Ginoo. Atong ipakita sa Dios nga kita mapasalamaton pinaagi sa paggamit sa atong mga talento para sa pagpatunhay sa iyang paghari dinhi sa yuta. Hinaot unta nga sa katapusan sa panahon, makaingon kita sa Ginoo: “Dios ko, gisulayan ko pagbuhat ang tanan kong mahimo.”