Ika-3 nga Domingo sa Kwaresma (B)

Ex 20:1-17; 1 Cor 1:22-25; Jn 2:13-25

Ang ebanghelyo naghulagway unsa kadako ang kasuko ni Jesus sa dihang iyang nakita ang gipanghimo sa mga tawo didto sa templo: “Naglubid si Jesus og lapdos ug giabog sa hawanan sa Templo ang tanan lakip ang mga karnero ug nating baka. Gilimbuwad niya ang lamesa sa nangilis og kwarta ug gilabay ng mga sinsiyo. Giingnan niya ang namaligyag pati, 'Kuhaa ni ug dad-a sa gawas! Ayaw'g himoang merkado ang balay sa akong Amahan.'”

Ang mga Hudeyo nagtoo nga adunay mga mananap ug butang nga mas angayan ihalad sa Dios. Tungod niini, adunay mga mamaligya og mananap ug mangingilis sa kwarta, nga kadaghanan mga kapamilya sa mga kadagkoan sa templo. Ang mga manimbahay sa Dios, ilabi na ang mga kabos, kanunay nga mapahimuslan aning mga negosyante sa templo. Dinhi nato masabtan ang kasuko nga gipakita ni Kristo. Ang balay sa Dios nahugaw dili lang tungod sa mga mananap ug mga sensiyo nga gipamaligya kondili tungod usab sa daotang mga buhat nga nagakahitabo didto sa hawanan sa templo niadtong panahona. Ang mga pangulo sa templo nga angay unta mag-alagad sa katawhan sa Dios nagpadato ug nagpahimulos naman hinoon sa mga halad ug mga buhis nga gikan sa mga tawo.

Ang paglimpiyo sa templo nahimong simbolo sa paghugas ni Kristo sa kasingkasing sa matag tawo, nga mao usab ang templo sa Espiritu Santo. Ang kasuko ni Kristo dili sama sa atong tawhanong kapungot tungod kay kini nagtumong man sa kaluwasan sa tawo ug dili sa iyang kaalaotan. Kondenahon sa Dios ang sala, apan iya nga luwason ang makasasala.

Kanus-a man ang tawo makasala? Kanus-a man mahimong hugaw ang atong kasingkasing? Diha sa unang pagbasa, nadungog nato ang Napulo ka Sugo sa Dios. Atong sayran nga kining mga Sugo gihatag sa Dios ngadto sa mga Israelita aron mahimo nilang gabayan sa pagpuyo isip piniling katawhan ni Yahweh. Gabayan kini, dili babag, alang sa tinuod nga kalipay sa tawo. Isipon nga makasasala o hugaw ang tawo nga mosupak sa bisan usa niining Napulo ka Sugo tungod kay sa pagbuhat sa ingon naghimo siya og kadaot sa iyang isigkatawo ug sa iyang kaugalingon.

Niining panahon sa kwaresma, giagni kita sa Simbahan nga moduol sa sakramento sa kumpisal aron nga malimpiyohan ni Kristo ang atong mga sala. Sa atong pagpangandam, susihon ta nga mapaubsanon ang atong kaugalingon pinaagi sa pagpangutana:

Nagbaton ba kita og laing dios gawas kang Yahweh?

Nagpasipala ba kita sa ngalan sa Dios?

Gibalaan ba nato ang adlaw nga Domingo o Igpapahulay?

Gitahod ba nato ang atong ginikanan?

Wala ba kita magpatay?

Wala ba kita manapaw?

Wala ba kita mangawat?

Wala ba kita mamakak sa atong isigkatawo?

Wala ba kita maninguha sa kabtangan sa atong isigkaingon?

Wala ba kita maninguha sa kapikas sa atong isigkatawo?