Ika-15 nga Domingo sa Ordinaryo nga Panahon (B)

Am 7: 12-15; Eph 1: 3-14; Mk 6: 7-13

Ang ebanghelyo niining Domingoha nagpahinumdum kanato mahitungod sa atong pagkamagsasangyaw ug sa batasan o kinaiya nga angay natong dalhon diha sa pagtuman niining misyon nga gisangon kanato.

Sa iyang pagkasiya, ang simbahan usa ka misyonaryo nga katawhan. Ang iyang kinabuhi ug kaanindot dalhon gayud sa bisan asa nga dapit aron ipaambit sa tanang katawhan. Atong sayran nga si Jesus nagdapit og mga sumusunod dili aron mahimong pundok sa katawhan nga magkinaugalingon kondili aron mosunod sa iyang mga lakang ug magsangyaw mahitungod sa dakong gugma sa Ginoo. Nagtawag siya og mga tawo dili aron mag-alagad kaniya kondili aron mag-atiman sa uban. Nagdapit siya og mga sumusunod dili aron magtrabaho para kaniya kondili aron magtrabaho uban kaniya para sa katumanan sa paghari sa Dios dinhi sa kalibutan.

Importante kaayo nga atong puy-an ang kinaiyahan ug misyon nga atong nadawat diha sa sakramento sa bunyag. Pinaagi sa bunyag, nahimo kitang mga Kristiyanos ug nakadawat sa misyon sa pagsangyaw sa Maayong Balita. Dili maayo nga Kristyanos lamang kita sa ngalan kondili sa pulong ug sa buhat. Dili dapat nga Kristiyanos lamang kita matag Domingo kondili sa matag adlaw sa atong kinabuhi. Dili angay nga Kristianos lamang kita sa sulod sa simbahan kondili sa tanang dapit diin kita mabutang. Dili usab maayo nga Kristiyanos lamang kita uban sa atong pamilya kondili sa atong pagpakig-uban sa tanang tawo. Ang atong pagkabinunyagan nagtawag kanato nga molakaw sa kalibutan aron magpaambit sa gugma sa Dios ngadto sa tanang katawhan ug sa tanang panahon.

Daghan kaayo ang pamaagi ug kahigayonan sa pagpuyo sa atong pagka-Kristohanon. Pananglitan, ang usa ka pulis mahimong tinuod nga Kristiyano pinaagi sa pagmatinud-anon sa pagbantay sa kalinaw ug sa dili pagdawat og soborno gikan sa mga daotang tawo. Ang usa ka magtutudlo mahimong tinuod nga sumusunod ni Kristo pinaagi sa paghatag og maayong pagtulun-an ug panig-ingnan sa iyang mga estudyante. Ang usa ka negosyante mahimong tinuod nga Kristiyano pinaagi sa pagpamaligya nga walay pagpanikas. Ang usa ka driber sa trak de pasahero mahimong tinuod nga sumusunod ni Kristo pinaagi sa mabinantayong pagmaneho ug sa pagsunod sa mga balaod sa dalan. Ug ang usa ka politiko mahimong tinuod nga Kristiyano pinaagi sa tinuoray nga pag-alagad sa katawhan ug sa dili pagpangurakot.

Diha sa ebanghelyo, gipadala ni Jesus ang iyang mga tinun-an nga magtinagurhaay. Sa ilang panahon ug kahimtang, dili maayo nga magbiyahe nga mag-inusara tungod kay adunay mga tulisan diha sa dalan. Sa ilang pagsangyaw, ang mga sumusunod ni Kristo angay nga magtinabangay ug magbantay sa usag-usa. Kining bahina sa kasulatan magpahinumdum kanato nga ang Kristohanong misyon dili pribado o kinaugalingon nga trabaho. Sa atong pagsangyaw, magtinabangay kita tungod kay dili sayon ang trabaho. Manginahanglan kita sa tabang sa usag-usa aron magmalampuson sa trabaho sa pagpangluwas nga gisangon kanato ni Kristo.

Ang usa ka estudyante madasig sa pagtuon kon tabangan siya sa iyang mga kaklase nga makasabut sa ilang leksyon. Ang usa ka nurse madasig sa pag-alagad sa mga masakiton kon ang iyang mga kauban sa ospital mainiton usab sa ilang pag-atiman sa mga pasyente. Ang usa ka kagawad sa lungsod mahagit sa pagpanerbisyo kon ang iyang mga kauban sa konseho dili mag-apil sa pangpangurakot. Ug bisan gani ang usa ka pari madasig sa paghatag sa iyang kinabuhi para sa Simbahan kon ang iyang mga kaubang pari magpuyo usab nga matinud-anon sa ilang mga panumpa. Kon ang atong mga kaigsoonan, kahigalaan, ug kauban sa trabaho magtinapolan o magpasagad sa ilang mga obligasyon, bation kita og kaluya ug mawad-an og gana sa pagpangalagad. Busa, angay gayod kitang magtinabangay aron dili kita kahutdan og kadasig sa pagtuman sa sugo ni Kristo.

Sa ilang pagsangyaw, gimandoan usab ni Jesus ang iyang mga tinun-an nga dili magdala bisan unsa gawas sa sungkod. “Walay pagkaon, walay sako, walay kwarta.” Sa panahon ni Kristo, praktikal kini nga sugyot. Ang magsasangyaw maglakaw sa lagyo nga mga dapit ug angay lamang nga dili sila magdala og bug-at nga mga gamit. Gawas pa niini, ang kwarta ug materyal nga mga butang maoy makadani sa mga tulisan nga nag-atang diha sa dalan. Busa, sa ilang pagbiyahe, ang mga sumusunod ni Kristo angay lamang magsalig sa tabang sa Ginoo ug sa kaayo sa mga tawo.

Bisan tuod lahi na karon ang atong panahon ug kahimtang, angay gihapon natong hatagan og gibug-aton kining pahimangno ni Kristo sa pagkinabuhi nga gawasnon sa mga materyal nga butang. Ang kalibutanong bahandi maayo man kon kini makapaduol kanato sa Dios ug makapahimo kanatong mahigugmaon sa isigkaingon. Apan basi sa kasinatian, kon daghan ra kaayo ang mga materyal nga butang, maglisud kita sa pagsabut sa plano sa Dios para kanato ug dili na hinuon kita makasunod ni Kristo.

Busa, angay gayod nga atong susihon sa tinuoray kon unsa na ang papel sa atong mga kabtangan diha sa atong pagsunod kang Kristo. Nakapaduol ba kini kanato sa Dios o nakapalayo ba hinoon? Kining mga bahandi nakahimo ba natong mas mahigugmaon, mas manggihatagon, ug mas manggiloloy-on sa atong isigkaingon?