Kristo nga Hari (B)

Daniel 7:13-14; Pagpadayag 1:5-8; Juan 18:33-37

Sa usa ka marriage encounter seminar, gusto nga sutaon sa pari kon kinsang tingog ang matuman diha sa pamilya sa mga partisepante. Iya silang giingnan, “Kadtong mga bana nga maoy hari sa panimalay, palihog ari mo lingkod sa tuo nga dapit. Kadtong mga 'ander ni misis', palihog lingkod sa wala nga dapit.”

Pwerteng kurata sa pari kay halos tanang mga bana didto man nanglingkod sa wala nga dapit ug usa lang gyud ka buok ang milingkod sa tuo. Nagpasabot ba kini nga usa lang sa gatosan ka bana ang tinuod nga hari sa panimalay?

Ug gipanguta sa pari ang nag-inusara nga bana, “Unsa may imong sekreto brod nga naghari man gyud ka sa imong pamilya?”

“Hari?” daw nahibulong ang lalaki. “Ambot lang padre. Basta nia ko dinhi naglingkod sa tuo kay mao ni pagbuot sa akong asawa.”

Kon makadungog ta sa pulong nga hari, ato dayong mahunahuna ang usa ka tawo nga isog o gamhanan. Ang hari mao ang tawo nga maoy mopatigbabaw o modaog. Kinsa man ang hari sa boxing? Si Manny Pacquiao. Kinsa man ang hari sa pop music? Si Michael Jackson. Kinsa man ang hari sa negosyo sa Pilipinas? Si Henry Sy. Kinsa man ang hari sa kalsada sa Cagayan de Oro? Ang mga driver sa jeep de pasahero.

Apan, sa atong pagpasidungog ni Kristo nga Hari, wala kita maghunahuna og Dios nga maisog o gamhanan. Wala usab kita maghunahuna og Dios nga maoy magpatigbabaw o magbuot sa tanan. Wala usab kita maghunahuna og Dios nga magpaserbisyo sa mga tawo. Lahi siya nga pagkahari tungod kay siya ang mag-alagad sa iyang katawhan, tungod kay gusto siya magpatigbabaw sa kamatuoran, hustisya ug kaangayan, ug tungod kay mahimo niya kalimtan ang iyang kaugalingon para sa kaayohan sa uban.

Sa pagpangutana ni Pilato kang Jesus, “Ikaw ba ang hari sa mga Hudeyo?”, siya mitubag, “Ang akong gingharian wala dinhi sa kalibutan.” Sa iyang pag-ingon niini, gipasabot ni Jesus kang Pilato nga ang iyang pagkahari dili kalibutanon. Dili siya sama ni Caesar, ang hari nga gisilbihan ni Pilato nga igo lamang magmando ug magpaserbisyo. Ang pagkahari ni Kristo lahi tungod kay kini inubanan sa dakong gugma, kamaalagaron, paghatag sa kaugalingon ug pagsakripisyo.

Sa Daang Kasabotan, ang tawhanong hari maoy giisip sa mga hudeyo nga representante sa Ginoo. Mag-alagad siya sa Dios ug mag-atiman sa Iyang katawhan. Ang usa ka hari maningkamot sa pagsabot sa kabubut-on sa Dios ug magpatuman niini sa katawhan. Ipaniguro niya nga ang katawhan mabuhi nga malipayon ug malinawon, layo sa katalagman ug kasakitan. Pinaagi kaniya, mabati sa mga tawo nga sila gipangga ug gipanalipdan sa Ginoo.

Atong makita diha sa Balaang Kasulatan nga kon ang usa ka hari mahimong daotan o mag-abuso sa iyang gahum, ang katawhan mosangpit dayon sa Ginoo ug mangandoy nga Siya na lang ang mahimo nilang Hari. Diha sa unang pagbasa, si propeta Daniel nanagna sa pag-abot sa usa ka tinuod nga Hari, nga munaog gikan sa langit aron maghari sa tibuok kalibutan hangtod sa kahangturan. Kining maong panagna nahatagan og katumanan diha ni Jesus. Siya mao ang gipadala sa Ginoo aron maghari pinaagi sa pag-alima sa Iyang katawhan. Matud pa ni San Pablo sa ikaduhang pagbasa, “Si Jesus mao ang hari sa tanang hari, nga nahigugma ug nagluwas kanato gikan sa sala pinaagi sa pag-ula sa iyang dugo.”

Bililhon kaayo kanatong mga Pilipino karon kining atong pagsabot sa pagkahari ni Kristo. Nagsugod na kita karon sa pagtimbangtimbang kon kinsa ang atong pilion nga mangulo sa atong nasud, sa atong mga probinsya, mga distrito, mga dakbayan ug mga lalawigan. Ang Simbahang Katoliko maggiya kaninyo sa pagpili og maayong mga pangulo, apan dili kini magbuot kaninyo kon kinsa ang pilion. Hinaot lamang unta nga makamao kita magpili og mga tawo nga maghari kanato pinaagi sa matinud-anong pag-alagad. Dili unta kita makapili og mga tawo nga walay kahadlok sa Dios, mga kurakot, mga kawatan, mga walay pagtahod sa kinabuhi, ug mga mapahimuslanon. Dili unta nato ibaligya ang atong boto, ang atong katungod, ug ang kaugmaon sa atong mga anak.

Mag-ampo kita ngadto sa Kristo nga Hari aron lamdagan ug giyahan niya kita sa kanunay.