Ika-5 nga Domingo sa Pagkabanhaw (B)

Acts 9:26-31; 1 Jn 3:18-24; Jn 15:1-8

Niadtong miaging Domingo, gipakasama ni Kristo ang iyang kaugalingon sa usa ka maayong magbalantay sa mga karnero. Iyang gipasabut nga kita ang mga karnero ug nga andam siya maghalad sa iyang kinabuhi alang sa atong kaayohan.

Karong Domingoha, si Kristo migamit og laing hulagway aron mapasabut og dugang ang iyang relasyon uban kanato. “Ako ang punuan sa ubas ug kamo ang mga sanga” miingon siya. Kining maong paghulagway magtudlo, una sa tanan, nga si Kristo maoy tuburan sa atong kinabuhi. Sama nga ang mga sanga nagsalig sa ilang kinabuhi sa ubas, kita usab mabuhi lamang kon kita mahilambigit kang Kristo. Kon mahimulag kita kaniya, kawad-an kita og bililhong kinabuhi. Gipaklaro kini ni Kristo sa pag-ingon: “Si kinsa kadtong dili magpabilin kanako, ilabay sama sa pinutol nga sanga ug malaya.”

Sa usa ka parasan, atong makita ang daghang mga sanga sa ubas, apan dili nato mahinungan ang ilang punuan. Bisan pa niini, makasiguro kita nga anaa gayud ang punoan kay kon wala pa, dili unta mabuhi ang mga sanga. Sa samang paagi, bisan dili nato makita si Kristo, makasiguro kita nga naa siya nakig-uban kanato kay siya man ang naghatag kanato sa kusog ug sa kinabuhi.

Dugang pa, ang hulagway sa punuan sa ubas ug mga sanga magtudlo nga ang atong dignidad anaa sa atong pagkalambigit kang Kristo. Diha sa parasan, ang mga sanga sa ubas nabaligkos sa usag-usa. Sa ilang kadaghan dili na nato mahinungan kon asa ang mas dagko ug mas tag-as. Apan atong masiguro nga kining mga sanga nahilambigit sa usa ka punuan. Sa kinabuhing Kristiyano, dili usab angay nga tan-awon kinsa kanato ang mas dagko o mas habog sa katilingban. Ang labing importante nga kita mahiusa kang Kristo kay pinaagi niini, mahimo kitang sinagop nga mga anak sa Dios. Kini siya ang pinakadakong bili nga maangkon sa tawo tungod kang Kristo.

Sa katapusan, ang hulagway sa punuan sa ubas ug mga sanga magpahinumdum sa atong papel ug misyon sa katilingban. Gidapit kita nga magpabilin diha ni Kristo aron mabuhi ug makapamunga og daghang maayong buhat. Usa ka batud sa Balaang Kasulatan ang miingon nga diha sa ebanghelyo ni San Juan, ang pulong nga “pabilin sa Dios” o “pabilin kang Kristo” ("abide in God" or "abide in Christ") gibalikbalik sulod sa trenta-siete ka higayon. Kini nagpakita nga ang pagpabilin diha ni Kristo maoy labing maayo natong pagabuhaton. Si Kristo mismo nagsaad kanato nga kon kita magpabilin kaniya mamunga kita og daghan ug makapangayo sa bisan unsay angay natong pangayoon.

Sa unsa mang paagiha kita magpabilin diha ni Kristo? Atong sayran nga si Kristo atong makaplagan diha sa Balaang Kasulatan, sa Eukaristiya, ug sa Kristohanong katilingban. Busa, ang pakig-unong kang Kristo mahimo nato diha sa mapadayonon nga pag-ampo, pagsimba, pagpamalandong sa mga Pulong sa Dios, pagpaminaw sa pagtulun-an sa Simbahan, ug sa pagtrabaho sa apostolado sa kalooy ug gugma.

Kita gitahasan nga mamunga'g mga maayong buhat, dili kalibutanong dungog ug bahandi. Para asa man ang imong kwarta kon wala kay gugma? Unsa may bili sa imong dungog kon ang Dios wala mahimuot kanimo? Gitawag kita nga magtinabangay sa pagbuhat og maayo para sa isigkaingon alang sa katumanan sa paghari sa Dios. Usa ka magsusulat ang nag-ingon, “Ang yawa magmadaugon lamang kon ang mga tawong matarong walay pagabuhaton” (“The only way for evil to triumph is for good people to do nothing”).