Ika-6 nga Domingo sa Pagkabanhaw (B)

Acts 10:25-26, 34-35, 44-48; 1 Jn 4:7-10; Jn 15:9-17

Samtang nagkaon si lola sa iyang paniudto, si lolo naglingkod sa iyang tapad ug nagpaypay kaniya. Ang waiter nahimuot nga nagtan-aw sa duha ka tigulang ug mikomentaryo: “Lolo, garabe gyud tingali kadako sa imong gugma kang lola kay imo man siya nga bantayan ug paypayan samtang magkaon.” Ug mitubag si lolo sa pag-ingon: “Dong, maghulat man gyud ko nga mahuman kini si lola sa pagkaon kay gigamit pa man niya ang akong pustiso.”

Kabahin sa mga katapusang pahimangno ni Jesus ngadto sa iyang mga sumusunod mao ang paghigumaay sa usag-usa. Sa wala pa niya kini ihatag, iyang gipasabut sa mga tinun-an nga ang iyang gugma para kanila sama sa kadak-on ug kainiton sa gugma sa Dios Amahan para kaniya. “Sama nga ang Amahan nahigugma kanako, ako usab nahigugma kaninyo.”

Ang ikaduhang pagbasa nagpasabut kanato ngano nga angay gayud kitang mahigugma sa isigkatawo: “Higugmaon nato ang usag-usa kay ang gugma gikan sa Dios. Ang nahigugma natawo sa Dios ug nakaila sa Dios. Ang wala mahigugma wala makaila sa Dios kay ang Dios gugma.” Ang gugma diay usa ka Diosnong buhat. Kita, nga mga anak sa Dios ug tigdala sa Iyang dagway ug kasamahan, angay nga magmahigugmaon usab sama Kaniya. Pinaagi sa paghigugmaay sa usag-usa, atong mapakita sa kalibutan nga ang Dios anaa sa atong kinabuhi ug nga kita nakaila gayud kaniya.

“Paghigugmaay kamo sama sa akong paghigugma kaninyo.” Buot ipaniguro ni Jesus nga kita mahigugma sa sakto nga paagi. Nasayod man siya nga daghan kanato dili matinud-anon sa paghigugma. Pananglitan, dako ang atong respeto ug pagtagad sa mga tawo nga inila sa katilingban. Dali ra kita motabang sa mga tawo nga adunay ikabalos kanato. Moayuda lamang kita sa mga kabos kon adunay magtan-aw o masayud sa atong gibuhat. Kining klaseha sa gugma dili matinud-anon tungod kay ang tinuod nga gugma maglantaw sa kaayohan sa uban ug dili sa personal nga interes.

Ang tinuod nga gugma dili mamili ug walay kondisyon. Sa unang pagbasa, si Pedro mipasabut sa mga tawo nga ang gugma sa Dios walay gipalabi. Ang tanan, hudeyo man o hentil, mahimong bunyagan ug makadawat og kaluwasan pinaagi ni Kristo. Ang mga apostoles mismo nakasinati giunsa sila paghiguma ni Kristo. Gipili sila ni Jesus haloyo sa ilang pagkaordinaryo ug pagkamasalaypon. Kini tungod kay ang tinuod nga gugma mohatag sa walay pagkwenta ug andam magsakripsiyo para sa kaayohan sa uban. “Walay makalabaw sa gugma sa usa ka tawo nga andam mohatag sa iyang kinabuhi alang sa iyang mga higala.” Ug kini mao ang gihimo ni Kristo aron sa pagpadayag sa iyang gugma kanato.

“Gisultihan ko kamo niini aron ang akong kalipay maanaa kaninyo ug aron nga ang inyong kalipay mahingpit.” Sa iyang pag-ingon niini, gitudluan kita ni Kristo nga ang tinuod nga kalipay anaa sa paghatag ug sa paghigugma nga walay paglantaw og balos.