Adlaw sa Mga Patay (B)

“Usa na lang ka semana ang tagal sa imong kinabuhi busa pangandam na”, matud sa doktor.

Nakurat ang pasyente ug miingon, “One week? Unsaon naman nako pagbayad sa akong bayronon sa imo dok nga wala nakoy panahon nga mangitag kwarta?”

Ug miingon ang doktor, “Kon mao na, hatagan taka og one-month.”

Ang “Adlaw sa mga Patay” o “Kalag-Kalag” magpahinumdum kanato sa kahamubo sa kinabuhi sa tawo ug magdapit kanato sa pagpamalandong sa unsay umaabut human niining kinabuhia. Adunay dakong kalainan sa kalibutanong panan-aw mahitungod aning mga butanga ug sa atong panan-aw isip mga magtotoo.

Ang kalibutanong hunahuna magtoo nga magdugay ta aning kalibutan. Trabaho og ayo, pagtigum og daghan kwarta, ug pagtukod og dagkong balay. Pahimulos sa imong kabatan-on ug unya na pagdiniyos kon matigulang na ka. Tagbawa una ang imong kaugalingon sa mga butang kalibutanon samtang baskog pa ug unya na trabaho sa simbahan kon magretiro na ka.

Adunay kalibutanong hunahuna nga makasabut sa kamubo sa kinabuhi, apan daw susama ra ang ilang prinsipyo sa nahiuna. Pahimulos og lingawlingaw kay dili ra ba ka magdugay dinhi sa kalibutan. Suroy, kaon ug inum sa walay tihik-tihik samtang buhi pa ka. Walay pahulay-pahulay; unya na ang pahulay kon patay na ka.

Ang tawong kalibutanon mahadlok motan-aw sa umaabut; dili siya ganahan mamalandong sa unsay mahitabo kaniya inig katigulang na niya; labaw siyang mahadlok maghunahuna sa adlaw sa iyang kamatayon ug sa unsay mahitabo human niini. Kasagaran, ang tawong kalibutanon magpuyo nga mahadlokon, matigulang nga masulub-on ug mamatay nga walay preparasyon. Atubangan sa Dios nga Maghuhukom, unsa kahay iyang pagabation?

Isip mga magtotoo, kita gitudloan sa Simbahan nga ang kinabuhi sa tawo gasa sa Dios. Matag adlaw, matag minuto, matag segundo sa atong kinabuhi gasa sa Dios. Ug tungod kay gasa man kini sa Dios, ato kining gamiton sa maayo sumala sa Iyang kabubut-on. Dili nato kini abusaran, dili usab nato kini usikan.

Ang Dios lamang ang magbuot asa ug kanus-a ra kita kutob ning kalibutana. Hinoon, nasayod kita nga ang kinabuhi sa tawo dinhi sa kalibutan mubo ra. Pangutan-a ang imong lolo nga 90 anyos ang panuigon unsa kadugay ang kinabuhi sa tawo ug moingon siya, “Murag kagahapon lang man ko nahimong batan-on.” Sakto ang Balaang Kasulatan sa iyang pag-ingon: Ang tawo sama sa sagbot, moturok inig kabuntag, mobuswak inig kaudto, ug malawos inig kahapon.

Ang kamubo sa kinabuhi dinhi sa kalibutan makapabalaka sa tawong kalibutanon, apan dili sa mga tawong matoohon. Kita nga mga sumusunod ni Kristo mitoo sa iyang gipamulong: “Ang motoo kanako dili mamatay kondili makabaton sa kinabuhing dayon”. Gihimo kita para makig-uban sa Dios, dili aron magpabilin ning kalibutana. Ang atong pagpangandam dili ra kutob dinhi kondili sa kinabuhi nga giandam sa Dios kanato.

Ang tinuod nga magtotoo angay madasig sa paghatag og bili sa matag segundo ning kinabuhi sa kalibutan. Gamiton nato ang matag gutlo sa atong kinabuhi sa paghimo sa kabubut-on sa Dios. Dili nato usikan ang mga adlaw sa pagpakig-away, pagpakigdumot ug pagpakigbungol sa atong mga igsoon ug silingan. Dili nato kawangon ang daghang oras sa pagsugal, pag-inum ug ubang daotang mga bisyo. Hinoon, gamiton nato ang matag panahon sa mga butang nga makahuluganon sama sa pag-alagad sa usag-usa, paghigugmaay, pagpinasayloay ug uban pa. Dili na ta angay maghulat og ugma aron makighiuli sa kaaway. Dili nata maghulat og matigulang para magtinarong. Dili nata maghulat nga masakit para magbag-o sa batasan. Dili nata maghulat nga moretiro para motabang sa Simbahan. Kon duna tay gusto nga buhaton para sa Dios ug sa isigkatawo, buhaton na nato karon kay basin ugma ulahi na ang tanan.

Miabut ang anghel sa kamatayon sa tungang gabii aron kuhaon ang usa ka 50 anyos nga datong negosyante. Sa kakurat ug kalisang, ang adunahan nakig-deal sa anghel sa kamatayon sa pag-ingon: “Ihatag nako sa imo ang usa ka milyon, pero hatagi sa ko og usa ka semana aron ipahiluna ang akong negosyo.” Apan, ang anghel mitubag, “Panahon na nimo, wala na tay mahimo.”

“Ihatag nako ang katunga sa akong katigayonan, hatagi lang kog usa ka adlaw aron makighiuli sa akong mga igsoon nga nakaaway”, pakilooy sa negosyante. Apan, ang anghel mitubag, “Panahon na nimo, wala na tay mahimo.”

Ug mihirit pa gyud ang negosyante sa pag-ingon, “Ihatag na nako sa imo ang tanan kong bahandi, hatagi lang sa kog usa ka minuto aron mangayo og pasaylo sa akong asawa.” Apan, ang anghel mitubag, “Panahon na nimo, wala na tay mahimo. Let's go”