Saturday, May 11, 2013

Ascenscion Sunday (Year C)


Buhat 1:1-11; Efeso 1:17-23; Lukas 24:46-53

Ang kasaulogan sa Pagsaka sa Langit sa atong Ginoo magpahinumdum kanato sa dakong misyon nga iyang gibilin sa mga tinun-an. Si Cristo miingon: “Panglakaw kamo sa tibuok kalibutan ug agniha ang mga tawo sa pagsunod kanako. Bunyagi sila sa ngalan sa Amahan, sa Anak ug sa Espiritu Santo, ug tudlo-i sila sa pagsunod sa tanan nga akong gisugo kaninyo” (Mt 28:18-19). Kining maong misyon gisangon dili lamang sa mga apostoles kondili sa tanang mga sumusunod ni Cristo.

Bisan nisaka na si Cristo sa Langit, diin siya nagalingkod sa too sa Amahan, siya nagpabilin dinhi sa kalibotan pinaagi sa Simbahan, ang pundok sa iyang mga sumusunod. Ang Espiritu ni Jesus nagpadayon sa pagpanudlo, pagbalaan, ug pagpangalagad pinaagi kanato. Kon kita magmatinud-anon sa atong pagka-Kristiyano, ang kalibotan makasinati gihapon sa Diosnong gugma ug kaayo.

Adunay duha ka managhigala – ang usa Kristiyano; ang usa walay pagtoo sa Dios (atheist). Usa ka adlaw niana, kining duha naglakaw padulong sa merkado. Sa ilang paglakaw, nalabyan nila ang grupo sa mga batan-on nga nag-away, nagsininggitay ug nagsinukmagay.

Unya, mabiaybiayon nga namulong ang atheist: “Brod, nganong motoo man ka ni Cristo. Tan-awa ra god, kapin na sa 2000 ka tuig ang Kristiyanismo sa kalibutan, apan ang mga tawo puno pa gihapon sa pagdumot ug kasilag sa usag-usa.” Wala makatingog ang Kristiyano.

Pag-abot nila sa merkado, nakita nila ang grupo sa mga bata nga nagdula – hugaw ug bulingit ang mga nawong. Dinhi nakalugar ang Kristiyano paghatag og komento. Iyang giingnan ang atheist: “Brod, kapin na sa 2000 ka tuig nga namugna ang sabon, apan hangtod karon daghan pa gihapon ang mga bata nga nagkamulitsing ang nawong.”

Ang Kristiyanismo, sama sa sabon, kon dili nato puy-an o gamiton, walay kaayo nga mahatag sa tawo. Kon dili ta Kristohanon diha sa atong panimalay, wala gyoy kalinaw ang atong pamilya – walay gugma, walay grasya. Ingon usab niini ang mahitabo diha sa merkado, sa opisina, sa eskuylahan, ug sa bagang katilingban. Kon ang mga Kristiyano magpuyo og kinabuhi nga dili subay sa kang Cristo, maghari ang kagubot, kasakit ug kalisdanan.

Ngano man nga sukad sa dugay nang panahon hangtod karon ang eleksyon gubot ug samok nga himoon? Ngano man nga hangtod karon adunay mangulo sa nasod ug sa lungsod nga dili moral ang kinabuhi ug dili makamao? Ngano man nga hangtod karon kulang ang serbisyo nga atong makuha sa gobyerno? Dili ba kini tungod kay daghan kanato - politiko ug mga botante - dili Kristohanon panahon sa kampanya ug eleksyon? Daghang manikas, mamintaha, ug manghulga. Daghang magdinaotay ug maglinabayay og hugaw. Daghang magpinalitay ug magbinaligyaay og mga boto. Kon dili ta mag-Kristiyano sa pagpili og mga pangulo sa nasod ug sa lungsod, magkamulitsing lang gihapon ang atong kinabuhi – wala tay mapaabot nga mga maayong leder, saktong serbisyo, ug nindot nga panginabuhi-an ug trabaho. Ang Kristiyanismo, sama sa sabon, kon dili nato puy-an ug gamiton, walay kaayo nga mahatag sa tawo.