Juan 16:20-23. Kanus-a man mahimong kalipay ang atong mga kasakit?
Sa ebanghelyo gigamit ni Cristo ang hulagway sa usa ka inahan nga nagbati. Dili
lalim ang kasakit nga masinati sa usa ka babaye nga padulong manganak. Apan ang
tanan niyang kasakit malimtan ug mapulihan sa dakong kalipay inigkakita niya sa
iyang bag-ong nahimugso nga anak. Sa atong pagsunod kang Cristo, makasinati
usab kita’g mga pagsakripisyo diha sa atong pagsunod sa kabubut-on sa Dios -
diha sa pagpakigbatok sa daotan, diha sa pagbarog sa kamatuoran, diha sa
pagpasaylo ug sa paghigugma sa mga kaaway, ug uban pa. Apan ang tanan natong
kahago ug kasakit mawala ug mapulihan sa kalipay human nato makita ang mga
bunga sa atong maayong binuhatan.
