Lucas 7:11-17. Unsa may angay natong buhaton atubangan sa kalisod
ug kagul-anan sa uban? Diha sa ebanghelyo gikahinagbo ni Jesus ang mga tawo nga nagdala’g
patay’ng lawas sa batan-ong lalaki. Sa dihang nakita ni Jesus ang inahan sa
namatay, gibati siya’g dakong kalooy. Nalooy siya pag-ayo tungod kay ang maong
babaye byuda, nga sa ato pa, namatyan na’g bana, unya karon, nawad-an na usab
og bugtong anak. Gihikap ni Jesus ang lungon ug gibanhaw niya ang patay pinaagi
sa pag-ingon, “Dong bangon!” Kining maong hitabo magpakita kanato sa
kasingkasing sa Dios, nga andam makighiusa sa kasakit sa uban ug molihok alang
sa kinabuhi ug kaluwasan. Si Cristo nagdasig nato karon sa pagpakita’g dakong kalooy sa mga naglisod ug sa pagtabang sa ilang kalisdanan.
