Lucas 7:31-35. Unsa man ang makapahimo sa tawo nga sirado sa
pagpaminaw sa Pulong sa Ginoo? Daghan sa mga Judiyo nagreklamo sa mga paagi ni
Juan nga Magbubunyag; nagbagolbol usab sila sa mga gipanghimo ni Jesus. Aduna
bay sayop si Juan ug si Jesus? Wala. Sa pagkatinuod, kining mga tawhana dili
lang gyod ganahan maminaw sa kamaturoan ug dili abli sa kabag-ohan. Bisan sa
atong panahon, adunay mga tawo nga sama niini’g kinaiya – magsigi la’g panaway
sa gihimo sa uban; apan sa ilang kabahin wala usay gihimo nga kaayohan. Dili
nimo matambagan kay dili maminaw ug magtuman sa ilang kagustohan. Ang hinungdan
sa ingon niini nga batasan mao ang garbo. Ang tawo nga garboso dili gayod
makasabot ug makatuman sa kabubut-on sa Ginoo.
