Lucas
11:5-13. Unsa may gipasabot ni Jesus sa iyang pag-ingon: “Pangayo kamo, ug kamo
hatagan; pangita kamo, ug kamo makakaplag; tuktok kamo, ug kamo ablihan.”
Pinaagi niini, kita gidasig ni Jesus sa pagduol ug pagpatabang sa Iyang Amahan
sa panahon sa kalisod ug panginahanglan. Isip mapinanggaong Amahan, ang Ginoo
dili makatalikod kanato nga Iyang mga anak. Apan wala kini magpasabot nga
makapangayo kita bisan unsa na lang diha sa atong pag-ampo. Ang Dios, nga
labing nasayod unsay maayo, mohatag lamang sa mga butang nga makatabang kanato.
Busa, dili kita mabalaka o mangluod kon ugaling dili ihatag sa Dios ang atong
gipangayo. Hinuon, angay natong isipon nga kita giiway lamang sa Ginoo sa
butang nga makadaot sa atong kahimtang.
