MONDAY OF THE 2ND WEEK OF EASTER (YEAR B)

JUAN 3:1-8. SA UNSA MANG PAAGI ANG TAWO MAKASULOD SA LANGIT? Si Hesus miingon kang Nicodemo: “Walay makakita sa Gingharian sa Dios gawas kon siya matawo pag-usab.” Unsa may gipasabot niya sa mga pulong “matawo pag-usab”? Labing siguro, wala kini magpasabot og “lawasnon nga pagkahimugso” kay dili man posible sa tawo nga matawo pag-usab gikan sa iyang ginikanan. Ang “matawo pag-usab” mao ang espirituhanong pagkahimugso nga mahitabo sa usa ka binuhat nga mabunyagan o modawat kang Kristo ug magpuyo og bag-ong kinabuhi nga subay sa iyang panig-ingnan. Ang “pagkatawo og usab” mahitabo tungod sa lihok sa Espiritu Santo. Pinaagi niini, kita mahimong sakop sa usa ka katilingban diin ang Dios gisimba ug gisunod, diin ang katarong, kalinaw ug kalipay maoy maghari (Roma 14:17).