THURSDAY OF THE 2ND WEEK OF EASTER (YEAR B)

MGA BUHAT 5:27-33: KINSA MAY ATONG SUNDON – ANG MGA TAWO BA O ANG DIOS? Ang nabanhaw’ng Ginoo maoy naghatag sa mga apostoles ug kaisog sa pagsangyaw sa iyang ngalan. Bisan gidid-an sila sa mga kadagkoan sa mga Judiyo, gisangyaw nila si Hesus ngadto sa tibuok Jerusalem nga walay pugongpugong. Ngadto sa Pangulong Pari nga nagsukit-sukit kanila, ang mga apostoles nitubag: “Kinahanglan sundon namo ang Dios, ug dili ang mga tawo.” Kining mga pulonga magtudlo kanato nga ang Dios mao ang labing unang tingog nga atong paminawon. Ang Iyang kabubut-on ug kasugoan maoy una natong sundon. Ang tingog sa mga tawo atong sundon kon kini nahisubay sa mga balaod sa Dios. Nindot ang pahimangno ni William Penn: “Men must be governed by God, or they will be ruled by tyrants.”

JUAN 3:31-36. UNSAON MAN NATO PAGPAKITA ANG ATONG GUGMA? Ang tinuod nga gugma puno sa kamanggihatagon. Si Hesus miingon, “Ang Amahan nahigugma sa Iyang Anak ug gitugyan sa Amahan ang tanan ngadto Kaniya.” Sa laing higayon si Hesus misulti, “Ang tanan nga akoa imoha; ug ang tanan nga imoha akoa” (Juan 17:10). Ang gugma sa Dios Amahan ug Dios Anak wala magpabilin diha Kanila tungod kay ang tanan nga nadawat ni Hesus Iya mang gihatag kanato (Juan 15:15). Ang pulong nga “tanan” nagpasabot sa “dalan, kamatuoran, ug kinabuhi” nga gihatag ni Kristo kanato. Sa atong paghigugma sa usag-usa, hinaot nga dili lamang materyal nga butang ang atong mahatag kondili ang panig-ingnan sa kinabuhi nga nagagikan ug nagapadulong sa Dios.