Is 50:4-7; Phil 2:6-11; Mk 14:1-15, 47
Usa ka magsusulat ang nagkomentaryo nga ang pasyon ni Kristo, una sa tanan, dili mahitungod sa kasakitan sa atong Ginoo kondili sa dakong gugma sa Dios. Si Hesus nagpakasakit ug ang iyang pag-antos hilabihan kadako. Apan ang pag-antos dili sa kanunay makaluwas. Ang kasakitan ni Kristo nagdala kanato og kaluwasan tungod kay kini resulta sa hilabihan kadako niya nga gugma.
Nasayod kita nga dili tanang kasakit ug pag-antos bunga sa dakong gugma. Adunay mga tawo nga mag-antos tungod kay wala nila makab-ot ang ilang mga tawhanong damgo ug tinguha; ang uban masakitan tungod kay nasina sa kahimtang sa uban; ug ang uban mag-antos tungod sa daotan nilang binuhatan. Kining klaseha sa mga pag-antos walay makaluwas nga gahum. Lahi ang kasakitan ni Kristo tungod kay kini bunga sa iyang dakong gugma sa mga tawo. Gidawat niya nga mapaubsanon ang pagbiay-biay, pagdagmal ug bisan ang kamatayon sa krus aron ang katawhan sa Dios makabaton og kinabuhing dayon.
Sa unang pagbasa, si Propeta Isaias nagpadayag sa awit sa Nag-antos nga Sulugoon, diin gipakita ang dakong bili sa pagdawat sa kasakitan tungod ug alang sa paghigugma sa Dios. Ang pag-antos usa ka daotang realidad ug dili angay pangitaon. Apan kon kini moabut ug kinahanglang dawaton para sa kahimayaan sa Dios o para sa kabulahanan sa isigkatawo, kini magdala og kaluwasan.
Si San Pablo, sa ikaduhang pagbasa, naghisgot sa dakong pagpaubos ug pagsakripisyo nga gihimo ni Kristo. Wala niya ipasigarbo nga siya Anak sa Dios, hinuon siya nagpakatawo ug nagpakasama kanato. Nagpuyo siya sama sa usa ka buotan nga sulugoon ug nagmasinugtanon hangtud sa kamatayon. Ug tungod niini, gipasidunggan siya sa Dios Amahan ug ang tanang binuhat sa langit ug sa yuta miyukbo kaniya.
Sa atong pagsulod niining Semana Santa, atong pamalandongan ang atong mga pag-antos uban sa gihimo nga pagpasakit ni Kristo. Kining atong mga kasakit karon bunga ba sa atong paghigugma sa Dios o tungod lang kay dunay mga butang nga wala nato maangkon? Nag-antos ba kita tungod kay nag-alagad kita nga matinud-anon sa isigkaingon o tungod lang sa kapakyasan sa negosyo o trabaho? Unsay may naghatag kanato og kabalaka? Naguol ba kita tungod kay wala maghari ang kabubut-on sa Dios diha sa atong panimalay o tungod lang kay wala matuman ang atong mga kagustohan? Nabalisa ba kita tungod sa kahimtang sa mga kabos o tungod lang kay mas nadato ang atong silingan?
Kon ang atong mga pag-antos ug kagul-anan bunga sa atong matinud-anon nga paghigugma sa Dios ug sa isigkatawo, makalaum kita nga makauban ni Kristo sa iyang pagkabanhaw ug kadaogan.
No comments:
Post a Comment