Ika-2 nga Domingo sa Pagkabanhaw (B)

Acts 4:32-35; 1Jn 5:1-6; Jn 20:19-31

Ania kita sa ikaduhang Domingo sa Pagkabanhaw sa atong Ginoo, nga karon giila na nga “Domingo sa Kalooy sa Dios”. Sa iyang kinabuhi isip pari, si Santo Papa Juan Pablo Dos mibati og dakong kaikag sa pagtulun-an ni Faustina Kowalska mahitungod sa Kalooy sa Dios. Ug niadtong tuig 1993, isip pangulo sa Simbahang Katoliko, gideklara sa Santo Papa nga beata si Faustina ug gipahinungod kining Domingoha sa debosyon sa Kalooy sa Dios.

Ngano man nga kining adlawa ang gipili ni Juan Pablo Dos para ipahinungod sa debosyon sa Kalooy sa Dios? Kini tungod kay diha sa ebanghelyo, nga pagabasahon matag ikaduhang Domingo sa Pagkabanhaw, atong madungog nga ang nabanhaw'ng Ginoo mipakita sa iyang mga apostoles ug miingon kanila: “Dawata ang Espiritu Santo. Ang mga sala nga inyong pasayloon, mapasaylo sab; ang dili ninyo pasayloon, ipabilin sab nga sala.” Ang Simbahang Katoliko nag-isip niining maong teksto nga sukaranan sa sakramento sa kumpisal, ang tuburan sa kalooy sa Dios diha sa simbanan.

Ang tibuok kinabuhi ni Kristo maoy usa ka pagpakita sa kalooy sa Dios para sa tawo. Sa iyang ministeryo publiko, gidawat niya ang mga makasasala, gipasaylo ug gihagit nga magbag-o sa ilang kinabuhi pinaagi sa pagsunod sa iyang mga lakang. Bisan gani didto sa krus, si Kristo nagpadayon sa pagpakita og kalooy sa mga makasasala diha sa siyang pag-ingon: “Amahan ko, pasayloa sila kay wala sila masayud sa ilang gibuhat!”

Labaw nga makapahinulong kanato ang gihimo sa nabanhaw'ng Ginoo sa dihang siya unang nagpakita sa iyang mga apostoles. Ang mga tinun-an nanago sa usa ka lawak tungod sa kahadlok sa mga Hudeyo sa dihang kalit nga mitungha si Jesus sa ilang atubangan ug miingon: “Ang kalinaw maanaa kaninyo!” Kanila nga mitalikod kaniya sa iyang kalisud ug pag-antos, gihatag ni Jesus ang kalinaw. Nakasala ang mga apostoles sa ilang pagbiya ni Jesus sa kalbaryo tungod kay nanumpa man sila nga makig-unong kaniya. Angay unta sila nga sudyaan, apan ang pagpanudya dili subay sa kinaiyahan sa Dios. Sama sa amahan sa mausikon nga anak diha sa sambingay, si Jesus wala gyud magpanuko sa pagdawat ug pagpasaylo sa iyang mga tinun-an.

Sila nga nakadawat sa dakong kalooy ug pasaylo sa Dios maoy gitahasan maghupot sa gahum sa pagpasaylo sa sala sa mga tawo. Ang mga apostoles mogamit niining maong gahum dili aron maglaglag sa mga tawo ngadto sa kaalaotan kondili para nga ang tanang magbasol makasinati sa kalooy sa Dios. Ang mga obispo nga maoy manununod sa mga apostoles, inubanan sa ilang kaparian, mao na karon ang naghupot sa gahum sa pagpasaylo. Diha sa kumpisalan, sila magdala sa kasingkasing sa Ginoo nga puno sa gugma ug kalooy sa mga tawo.

Sa atong pagdawat sa kalooy ug pasaylo sa Dios, kita usab gihagit nga magpinasayloay sa atong mga sala. Giagni kita nga maghupot og kasingkasing nga sama sa balaan nga kasingkasing ni Kristo. Ang pagdumot ug pagpanudya dili angay sa tanang sumusunod ni Kristo. Kon tinuod kita nga mitoo kaniya, kinahanglan gayud nga usbon nato ang pamaagi sa atong pamuyo, kanang subay sa mga lakang ni Kristo.

Niadtong tuig 1984, ang inila nga TIME magazine nagbutang sa ilang front cover og usa ka hulagway nga nakapatandog sa tibuok kalibutan. Ang retrato nagpakita sa duha ka tawo nga naglingkod ug nagstoryahanay sulod sa usa ka prisohan. Duot ug nag-atubangay silang duha, mura'g gastoryahanay sa hilom aron dili madunggan sa uban. Ang batan-on nga lalaki mao si Mehmet Ali Agca nga nagsulay pagpatay sa Santo Papa. Sa iyang atubangan mao si Juan Pablo Dos, ang Santo Papa mismo nga gisulayan pagpatay.

Diha sa hulagway, gihawiran ni Juan Pablo Dos ang kamot ni Agca, ang kamot nga mikablit sa pusil nga nakaigo sa iyang baga. Gusto sa Santo Papa nga makita sa tibuok kalibutan kining maong talan-awon aron nga ang katawhan makat-on sa pagpasaylo sa usa'g usa. Ang gibuhat sa Santo Papa maoy usa ka makusganon nga pagsangyaw sa pagkamapasayloon sa Dios. Gigakos ug gipasaylo niya ang tawo nga nakahatag kaniya og dakong kasakit. Human sa 20 minutos nila nga panagstoryahanay, giisa ni Agca ang tuong kamot sa Santo Papa ug gibutang sa iyang agtang aron sa pagpakita sa iyang dakong pagrespeto.