Thursday, April 9, 2009

Huwebes Santo (B)

Ex 12:1-8, 11-14; 1 Cor 11:23-26; Jn 13:1-15

Ang ebanghelyo nagsaysay mahitungod sa pagpanghugas ni Kristo sa tiil sa iyang mga apostoles. Sa pasiuna ning maong storya, si San Juan miingon: “Si Jesus nasayod nga miabot na ang takna sa iyang pagbiya sa kalibutan ug pag-adto sa Amahan. Gihigugma niya ang tanan nga iyaha ning kalibutan, gihigugma niya sila sa gugma'ng way utlanan ug way makatupong.”

Atong nasayran nga kining pagpanghugas sa tiil gihimo ni Kristo sa gabii una siya namatay. Nabati ni Kristo nga nagkaduol na ang iyang kamatayon ug buot niya nga magbilin og usa ka maayong pagtulun-an o kasugoan sa iyang mga sumusunod. “Kon ako nga inyong Magtutudlo ug Ginoo naghugas sa inyong tiil, kamo usab kinahanglan nga maghugas sa tiil sa usag-usa. Gihatagan ta kamog panig-ingnan, sunda ninyo ang akong gibuhat.”

Sa kultura sa mga Hudeyo, ang paghugas sa tiil maoy trabaho sa usa ka ulipon sa balay. Himoon niya kini aron nga ang tanang tawo nga mosulod sa balay malimpiyohan ug mobati sa kahamugaway. Dinhi atong masabtan ang gibug-aton sa gibuhat ni Kristo. Nagpaubos siya sa iyang kaugalingon aron lamang makahatag og maayong ehemplo sa paghigugma. Ang gugma nga tiunay andam mag-alagad aron nga ang hinigugma makabaton og maayong kinabuhi.

Ang tibuok kinabuhi ni Kristo usa ka kinabuhi sa pag-alagad. Ug kini nahatagan og nindot kaayo nga hulagway diha sa pagpanghugas sa tiil. Dili baya sayon ang pagpahugas sa atong tiil. Maulaw kita kay dali ra kini mahugaw ug manimaho. Ang atong tiil maoy bahin sa atong lawas nga dili nato sayon ipahikap sa uban. Ug malisud usab para kanato ang paghugas sa tiil sa ubang tawo. Mao kini ang dakong hagit sa tinuod nga paghigugmaay. Ang mga pangutana mao kini: Mosugot ka ba nga mahibaw-an sa imong isigkaingon ang mga ngil-ad nga bahin sa imong pagkatawo? Andam ka ba nga magpahugas sa mga salawayong bahin sa imong kinabuhi? Sa laing bahin, andam ka ba usab nga modawat sa mga dili kaayo nindot nga bahin sa kinabuhi sa ubang tawo? Andam ka ba nga motabang kanila sa paglimpyo sa ilang ngil-ad nga mga binuhatan?

Si Kristo nagsugo kanato: “Paghinigugmaay kamo sama nga ako nahigugma kaninyo.” Ang gugma ni Kristo gihatag kanato sa walay kondisyon. Gihigugma kita niya dili tungod kay maayo ug limpiyo kita kondili tungod kay nanginahanglan kita sa tinuod nga gugma. Ug kini mao ang hagit para kanato: Maghinatagay kita sa gugma nga susama sa kang Kristo, kanang gugma nga andam magpaubos ug magsakripisyo para sa kabulahanan sa isigkatawo.

Sa ikaduhang pagbasa, gisaysay ni San Pablo ang iyang nahibaloan mahitungod sa pagtukod ni Kristo sa sakramento sa eukaristiya. Nahitabo ang Katapusang Panihapon nianang gabii nga si Jesus gibudhian, susamang panahon sa iyang pagpanghugas sa tiil. Dinhi atong masabtan nga ang paghinugasay sa tiil usa ka importanteng bahin sa eukaristiya nga saulogon unya sa tanang mga sumusunod ni Kristo. Ang eukaristiya mahimo lamang makahuluganon kon ang mga modawat niini makamao nga mag-alagad sa usag-usa sama sa pag-alagad nga gihimo ni Kristo sa iyang mga sumusunod.

No comments: