Ika-18 nga Domingo sa Ordinaryong Panahon (B)

Ex 16:2-4, 12-15; Eph 4:17, 20-24; Jn 6:24-25

Sa usa ka Pet Shop adunay usa ka baligya nga parrot nga kuyaw og abilidad. Masag-ulo niya ang tanan nga nahisulat sa Bibliya. Imo lang kining tagaan og bersekolo, ug dihadiha dayon isulti niya sa imo ang Pulong sa Dios sa maong bersekolo. Giganahan si Nestor sa parrot ug nakahunahuna siya nga iya kining paliton para sa iyang tigulang nga inahan nga nagpuyo sa probinsya. Ang iyang nanay dili na makabasa sa Bibliya tungod kay daot na ang mga mata. Sigurado siya nga malipay ang iyang inahan sa maong parrot kay kini maoy maghatag kaniya sa Pulong sa Dios.

Human sa usa ka semana sa iyang pagpadala sa parrot sa ilang probinsya, nakadawat si Nestor og “Thank You” card gikan sa iyang Nanay. Sulod sa card nabasa ni Nestor ang gamay nga note: “Anak, salamat kaayo sa imong gipadala nga langgam. Akong gi-adobo ug kini lami kaayo.”

Adunay duha ka matang sa kagutum: ang lawasnon ug ang espirituhanon.

Ang lawasnon nga kagutum mao ang kagutum sa mga tawo nga walay makaon. Tungod sa kawad-on, daghang mga tawo ang makasinati sa lawasnong kagutum. Samtang ang espirituhanon nga kagutum mao ang kagutum sa mga tawo nga wala pa makaila sa Ginoo, o kanila nga nangandoy pa sa tinuod nga kalipay, o sa mga tawo nga nangita pa sa kamatuoran.

Ang mga pobre kanato maoy kanunay makasinati sa lawasnong kagutum. Magkugi sa pagtrabaho matag adlaw aron makakaon. Kung walay swerte, hasta ang bitok mapasmo sa kagutum. Apan, mapobre o madato, ang tawo usahay makasinati sa espirituhanong kagutum. Mangandoy sa tinuod nga kalipay. Mangita sa tinuod nga kahulugan sa kinabuhi. Daghang mga tawo dili magmalipayon bisan anaa na kanila ang bahandi, dungog ug gahum. Ngano man kini? Ang ebanghelyo adunay tubag niini: “Ang tawo dili mabuhi sa pan lamang, kondili sa matag pulong nga magagikan sa baba sa Dios.” Ang kalibutanong pan (salapi, butang, tawhanong relasyon, ug uban pa) dili igo nga makatagbaw sa tawo. Ang tawo manginahanglan sa Dios tungod kay siya gikan man sa Dios. Si San Agustin nakaamgo niini ug siya nakapamulong: “O Lord, you have made us for Yourself, and our hearts are restless until they rest in you.” (“O Ginoo, gihimo mo kami para sa imong kaugalingon, ug ang among mga kasingkasing magpabilin nga dili mahiluna hangtud nga kini dili makapahulay uban kanimo.”)

Kon dunay duha ka matang sa kagutum, aduna usay duha ka klase nga pagkaon: ang materyal ug ang espiritwal. Ang tawo, sanglit binuhat nga lawasnon ug espirituhanon, kinahanglan nga mokaon sa materyal ug espiritwal nga pagkaon aron makabaton sa tinuod nga kinabuhi. Unsa man kining espiritwal nga pagkaon ug asa man kini makuha? Alang kanatong mga may pagtoo, ang espiritwal nga pagkaon mao ang mga pulong sa Dios nga makuha diha sa Balaang Kasulatan. Ato kining madawat ug matagamtam pinaagi sa pagbasa, pagpaminaw, pagpamalandong ug pag-ampo.

Diha sa ebanghelyo karon, si Jesus nagkanayon: “Ako ang pan sa kinabuhi. Ang mosunod kanako dili na gyud gutumon. Ang motoo kanako dili na gayud uhawon.” Unsa may iyang gipasabut niini? Si Jesus mao ang buhing Pulong sa Dios nga nagpakatawo. Pinaagi kaniya (sa iyang pulong ug kinabuhi) atong masabtan ang kinatibuk-ang mensahe sa Dios. Siya ang pinakabililhong pagkaon nga espiritwal nga gihatag kanato aron nga kita makabaton sa kinabuhing walay katapusan.

Sa unsa mang paagi nato madawat si Jesus, ang Pan sa Kinabuhi? Atong madawat si Jesus sa iyang kinatibuk-an diha sa Eukaristiya. Pinaagi sa pagkalawat, ang atong kinabuhi mahiusa kang Jesus ug sa tibuok simbahan. Ug kining maong kahiusahan mahatagan og kahulugan kon kita magsugod sa pagsunod sa kinabuhi ug panig-ingnan ni Jesus sa tanang dapit ug panahon. Pinaagi lamang niini kita makasinati sa tinuod nga kalipay ug makabaton sa katagbawan. Sa giingon na ni Jesus: “Ang mosunod kanako dili na gyud gutumon. Ang motoo kanako dili na gayud uhawon.”

Aduna koy mga higala nga igo-igo lang ang kahimtang. Mag-overtime gyud sa pagtrabaho aron adunay ikapakaon sa pamilya. Apan, bisan pa sa kadaghan sa ilang trabaho, aduna gihapon silay panahon para sa Ginoo. Makatandog kaayo hunahunaon nga haloyo sa kadaghan sa ilang giatiman, makalugar gihapon sila sa pag-adto sa Simbahan aron mag-ampo, mosimba ug mag-apil sa kalihokan ug apostolado.

Aduna sab koy mga kaila nga nagsobra na ang kwarta apan mokayod pa gihapon sa pagtrabaho ug pagnegosyo. Wala na hinuoy panahon para sa Ginoo. Wala pud gani panahon para sa pamilya. Subo kaayo palandungon nga bisan sa ilang kaugalingon dili na sila makaatiman tungod kay naulipon sa trabaho ug sa bahandi. Kining klaseha sa mga tawo dili makakita sa katagbawan ug sa tinuod nga kalipay tungod kay sa giingon na ni Jesus: “Ang tawo dili mabuhi sa pan lamang, kondili sa matag pulong nga magagikan sa baba sa Dios.”

Ang mga butang kalibutanon gihatag kanato sa Ginoo aron kita magmalipayon. Apan, sa atong paggamit kanila, angay kita nga magmabinantayon ug magmaalamon. Ang daghang mga butang makadisturbo kanato ug makahurot sa atong panahon para sa Ginoo. Usahay gani, tungod sa bahandi, ang tawo makalimot na nga aduna siyay panginahanglan sa Dios. Unya na pud mahinumdum pagsangpit sa Ginoo kon magkaproblema na, kon masakit na, o kon himalatyon na.

Busa, angay gayud nga atong hatagan sa dakong pagtagad ang mga pulong ni Jesus sa ebanghelyo karong adlawa: “Paghago kamo, dili alang sa kalan-on nga madunot, kondili sa kalan-on nga molungtad ug makahatag sa kinabuhing dayon.”