Marcos 10:2-16. Nganong dili man motugot
ang Simbahan sa diborsyo o panagbulag sa bana ug asawa? Usa sa mga dagkong hinungdan mao
ang kaugmaon sa mga anak ug sa katilingban. Ang mga bata manginahanglan og usa
ka lig-on ug masaligan nga panimalay aron sila motubo nga himsog ug malipayon.
Sumala sa kasinatian, kalagmitan sa mga anak sa magtiayon nga magkabulag
mahimong problemado sa ilang pagdako, pag-eskuyla, pagpakigrelasyon ug sa
pagpanarbaho. Ang kasakit ug kaguol nga ilang nasinati sa dihang nag-away ug
nagbulag ang ilang mga ginikanan maoy hinungdan sa dili maayo nga pagtubo sa
mga kabataan. Kon walay maayo nga kapaingnan ang mga anak o kabataan, wala usay
maayong kaugmaon ang atong katilingban.
