Lucas 10:1-12. Nganong gikinahanglan man
ang ministerio sa mga naordenahan (kaobispohan ug kaparian) ug mga laygo diha
sa Simbahan? Ang 12 ka mga apostoles maoy nagrepresentar sa mga naordenahan.
Gipili sila ni Jesus aron maoy mangulo sa iyang Simbahan. Sila ang magsiguro
nga ang katawhan sa Dios maatiman ug magiyahan. Ang 70 ka mga tinun-an, nga sa
ebanghelyo karon gipadala ni Jesus sa usa ka misyon, maoy nagrepresentar sa mga
laygo. Sa mga Hudiyo, ang numero 70 maoy simbolo sa mga nasud sa tibuok
kalibotan. Gigamit ang 70 aron ihulagway nga ang mensahe sa Dios angay dalhon
sa tanang lugar sa kalibotan. Ang mga laygo angay motabang sa pagsangyaw tungod
kay “daghan ang anihonon pero diyotay ra ang mangangani”.
