Juan
3:7-15. Unsa may gipasabot sa giingon ni Cristo nga “pagpakatawo pag-usab”? Sa
atong pagkahimugso diha sa sabakan sa atong inahan, wala kitay nahimong pagpili
ug dili nato kini kagustohan. Dili kitay nagbuot sa paagi, sa panahon sa atong
pagkatawo. Wala kita papili-a sa atong ginikanan, kolor, dugo ug kaliwat. Pero,
gipasabot ni Cristo kanato nga adunay “pagpakatawo pag-usab” nga atong masinati
pinaagi sa sakramento sa bunyag. Ug dinhi, kita gihatagan na og kagawasan sa
pagpili ug paghukom. Makapili kita sa pagdawat o sa dili pagdawat kang Cristo,
sa pagsunod o sa dili pagsunod kaniya. Ang kinatibuk-an ning maong
“pagkahimugso pag-usab” mahitabo sa panahon sa atong kamatayon – kanus-a kita
mobiya ning kalibotan ug mosulod sa bag-ong kinabuhi uban sa Ginoo.
