Juan 3:16-21. Unsa may mas masayon
– ang pagluwas o ang pagkondena og tawo? Ang pagkondena dali ra nga buhaton.
Bungolan, libakon, ug panghimaraoton lang nato ang tawo, human dayon ang
estorya. Apan ang pagluwas dugay ug malisod nga himoon. Kinahanglan ka nga
magsakripisyo, magpasensya, magpasaylo, ug maghatag og giya sa usa ka tawo.
Diha sa ebanghelyo si Jesus miingon, “Wala ipadala sa Dios ang Iyang Anak
nganhi sa kalibotan aron pagsilot kondili aron pagluwas.” Ang Ginoo mipili sa
malisod nga paagi. Nagmapailobon ug nagmapasayloon Siya. Naghalad Siya sa
kinabuhi sa Iyang Anak aron maluwas ang mga makasasala. Ang pangutana karon:
Kita nga Iyang giluwas angay bang magkondena o magluwas sa usag-usa?
