Lucas 24:13-35. Nabati na ba
nato nga murag gipasagdan kita sa Ginoo? Ang duha ka tinun-an nga naglakaw sa
dalan padulong sa Emmaus napuno sa kasubo, kahadlok ug kalibog tungod sa
kamatayon sa ilang Magtutudlo. Samtang sila naglakaw, niduol si Jesus ug
nakig-uban kanila, apan wala sila nakaila Kaniya. Diha na sila nakabantay nga
si Jesus diay kadto sa dihang kini “nipikaspikas sa pan” ug nihatag niini
ngadto kanila. Kining maong hitabo magtudlo kanato nga sa panahon sa kalisod ug
kasakit, ang Dios dili magpasagad kondili makig-uban kanato. Magpahinumdum usab
kini sa kabililhon sa Eukaristiya, ang pagpikaspikas sa pan, nga maoy maghatag
og tinuod nga kinabuhi. Diha sa Eukaristiya masabtan nato ang plano sa Dios ug
madawat ang gikinahanglang kusog ug grasya.
