Juan 6:35-40. Nganong gitawag
man ni Jesus ang iyang kaugalingon nga “Pagkaon sa Kinabuhi”? Ang pagkaon
importante sa kinabuhi sa tawo tungod kay maghatag man kini kanato’g nutrisyon,
kusog ug kabaskog. Kon wala ang pagkaon, ang tawo dili mabuhi. Apan unsa man
ang kinabuhi? Sa pagtulon-an ni Cristo, ang kinabuhi dili lamang lawasnon o
kalibotanon. Ang tinuod nga kinabuhi mao ang kinabuhi nga nahilambigit sa Dios,
nga maoy tuboran ug tag-iya sa tanang kinabuhi. Ang tawo nga puno sa kinabuhi
mao siya nga may maayong relasyon uban sa Dios. Kini maoy atong makab-ot kon
kita modawat kang Cristo, ang Pagkaon sa Kinabuhi. Pinaagi lamang kaniya, kita
mahilambigit sa Dios sa usa ka relasyon nga puno sa pagtoo, pagsalig ug
paghigugma.
