SATURDAY OF THE 18TH WEEK IN ORDINARY TIME (YEAR B)

MATEO 17:14-20. UNSA MAN NGA MATANG SA PAGTOO ANG GIKINAHANGLAN PANAHON SA KALISOD UG KAPAKYASAN? Diha sa ebanghelyo, ang mga tinun-an napakyas sa pagpahawa sa daotang espiritu nga diha sa batang patulon. Tungod niini, gisaway ni Hesus ang ilang kakulang sa pagtoo. Human ayoha ang bata, giingnan ni Hesus ang mga tinun-an nga kon aduna silay pagtoo, mahimo nila ang pagpabalhin og bukid. Ang “pagtangtang og bukid” maoy usa ka panultihon sa mga Judiyo nga nagpasabot og “pagtangtang sa kalisdanan”. Gigamit ni Hesus ang maong panultihon aron pagtudlo sa mga tinun-an nga kon mag-ampo ang tawo uban sa pagsalig sa Dios, mahimo niya ang pag-atubang sa mga kalisdanan ug ang pagsulbad sa mga suliran. Tinuod ang giingon: “Faith does not make things easy; it makes things possible.”