THURSDAY OF THE 20TH WEEK IN ORDINARY TIME (YEAR B)

MATEO 22:1-14. KINSA MAN ANG GUSTO SA DIOS NGA MAKAUBAN SA IYANG KALIPAY DIDTO SA LANGIT? Ang sambingay naghulagway sa langit isip usa ka kumbira sa kasal nga gipangandaman og maayo sa Hari. Adunay mga tawo nga gidapit ang Hari, apan sa dihang wala sila magpakitag interes sa pagtambong sa kumbira, gipadala sa Hari ang iyang mga sulugoon aron pagdapit sa tanang mga tawo nga ilang makit-an, maayo ug daotan. Kining maong sambingay magdasig sa tanan, ilabina sa mga tawo nga naghunahuna nga wala na silay paglaum sa kaluwasan tungod sa ilang pagkadaotan. Hinumduman nato ang panultihon: “Every saint has a past. Every sinner has a future.” Walay tawo nga walay daotang kagahapon. Apan wala usay tawo nga walay paglaum diha kang Kristo. Ang pultahan sa langit kanunayng abli alang sa tanan nga gustong magbag-o.