Lukas
18:35-43. Kinsa man ang mga buta sa atong katilingban? Ang makililimos diha sa
ebanghelyo usa ka tawo nga buta. Apan aduna siyay nakita nga wala makita sa
daghang mga misunod kang Jesus. Una, nakita niya kang Cristo ang Manluluwas nga
dugay nang gipaabot sa katawhan sa Israel.
Ug ikaduha, nakita niya ang iyang dakong panginahanglan sa panabang sa
Dios. Mao kini ang hinungdan sa iyang pagsinggit: “Jesus! Kaliwat ni David!
Kaloy-i intawon ako!” Kining maong buta maoy nahimong modelo para kanato sa usa
ka tawo nga nakakita sa tinuod nga kahayag. Gani, human ayoha ni Jesus, misugod
dayon siya sa paglakaw sunod sa Mesiyas. Mangutana kita karon: Nakita na ba
nato ang tinuod nga Kaluwasan? Naglakaw na ba kita uban sa tinuod nga Kahayag?
