Lukas
18:1-8. Malahutayon ba kita sa atong pag-ampo? Sa sambingay ni Cristo, ang huwes
walay kahadlok sa Dios ni pagtahod sa isigkatawo. Apan mihatag siya sa
gipangayo sa biyuda tungod kay nagbalikbalik man kini kaniya. Pinaagi ning
hamubo nga sugilanon kita gidasig ni Jesus sa pagmakanunayon sa pag-ampo.
Nganong madiskurahe man kita sa pag-ampo? Tungod ba kay wala ihatag sa Dios ang
atong gipangayo? Sabton nato nga ang Ginoo usa ka mahigugmaong Amahan, dili
sama sa huwes nga walay balatian. Tubagon Niya ang tanan natong pag-ampo, apan
usahay ang Iyang tubag “Dili”. Modumili Siya sa atong gipangayo kon kini
makadaot kanato o kon kini wala pa sa tukmang panahon. Busa, magpabilin kitang
masaligon sa Dios nga maoy nasayod sa atong kaayohan.
