Mateo 13:24-30. Unsa nga
puwersa ang maghari diha sa atong kinabuhi – katarong ba o kadaotan? Usa ka
titser ang nagpasabot sa mga batang estudyante kalabot niini. Matod pa niya:
“Sa kasingkasing sa matag tawo adunay duha ka lobo nga kanunay’ng gabugno. Ang
usa ka lobo yawan-on ug daotan – kini ang tigpasiugda og kasamok, kalaog,
panag-away, pagdinumtanay, kasina, ug pagdinaotay. Ang laing lobo maayo ug
matarong – kini maoy tigdasig og kalinaw, pagsinabtanay, pagpinasayloay,
pagtinahoray, paghinatagay ug pagtinabangay.” Unya, usa sa mga estudyante ang
nangutana: “Titser, kinsa man kaha sa duha ka lobo ang magmadaogon diha sa akong
kasingkasing?” Ug ang titser nitubag: “Kadtong lobo nga kanunay nimong
gipakaon.”
